Nur-Sultanda áleýmettik mańyzy bar taýarlar qansha turady
NUR-SULTAN. QazAqparat – Elordada áleýmettik mańyzy bar taýarlardyń baǵasyna monıtorıng júrgizilýde, dep habarlaıdy QazAqparat.
Qala ákimdiginen málim etkendeı, qysqy maýsymda áleýmettik mańyzy bar taýarlar baǵasyn turaqtandyrý jáne baǵa ósiminiń aldyn alý maqsatynda Nur-Sultan qalasynyń Investıtsııalar jáne kásipkerlikti damytý basqarmasy únemi baqylaý júrgizip otyr.
Máselen, «Astyqjan» jáne «KeńMart» saýda ortalyqtaryna monıtorıng júrgizilip, ondaǵy kartop pen sábizdiń baǵasy bir kelisi úshin (bólshek saýda) 78 teńgeden, pııaz – 73 teńgeden, qyryqqabat 93 teńgeden saýdalanyp jatqany belgilendi.
«Bul baǵalar «Sharyn», «Alash» sekildi iri bazarlardyń ortasha kóterme baǵasyna sáıkes keledi. Atalǵan baǵyttaǵy jumystar jalǵasýda jáne basqarma baqylaýyna alynǵan», - dedi ákimdikten.
