Nur-Sultanda áleýmettik mańyzdy azyq-túlikten tapshylyq joq – ákimdik
Nur-Sultan qalasynyń ınvestıtsııalar jáne kásipkerlikti damytý basqarmasy basshysynyń mindetin atqarýshy Erjan Baltaevtyń aıtýynsha, elorda halqynyń áleýmettik mańyzy bar azyq-túlik taýarlaryna qajettiligi jylyna 710 myń tonnany, al aıyna shamamen 60 myń tonnany quraıdy.
«2020 jyly qala boıynsha azyq-túlik óndirisiniń jalpy kólemi 235 myń tonna boldy. Bul qalanyń jyldyq qajettiliginiń shamamen 30%-yn óteıdi. Sondaı-aq, 185 myń tonna ónimdi saqtaýǵa bolatyn bes iri logıstıkalyq ortalyq bar. Qoldanystaǵy jeti kókónis qoımasy bar, onda jylyna 37 myń tonna ónim saqtalady. Osylaısha, jalpy saqtaý kólemi jylyna 222 myń tonnaǵa jetedi, bul elordanyń negizgi azyq-túlik taýarlaryna jyldyq qajettiliginiń shamamen 30%-yn saqtaýǵa múmkindik beredi», - dedi Erjan Baltaev Nur-Sultan máslıhatynyń turaqty komıssııalarynyń birlesken otyrysynda.
Onyń aıtýynsha, ákimdik kókónis qoımalary men basqa da ınfraqurylym jobalaryn iske asyrý boıynsha ınvestıtsııa tartý jumysyn jalǵastyrýda.
Qazirgi ýaqytta 15 myń tonna ónim saqtaýǵa bolatyn úsh kókónis qoımasy salynyp jatyr.
«Saýda zaldary men qoımalarda 60 myń tonna negizgi azyq-túlik taýarlary tutynylady, bul – qalanyń aılyq kólemi. Azyq-túlik taýarlaryn júıeli negizde jetkiziledi. Búgingi tańda ónim tapshylyǵy joq», - deıdi E. Baltaev.
