Nur-Sultanda aldaǵy bes jylda 50 mektep salynady
NUR-SULTAN. QazAqparat - Nur-Sultannyń ákimi Altaı Kólginov mektep dırektorlarymen kezdesti, dep habarlaıdy QazAqparat.
«Ustazdardyń eńbegi zor! Olar bir emes birneshe býynǵa bilim berdi. Biz óz tarapymyzdan odan ári qoldaý kórsetip, qolaıly jaǵdaı jasaımyz. Búgin oqý oryndary dırektorlarymen bilim salasyndaǵy ózekti máselelerdi talqylap, kelesi jylǵa jumys josparyn bekittik» dep jazdy Altaı Kólginov óziniń Instagram paraqshasynda.
Qala ákimi osy salada atqarylyp jatqan sharalarǵa jan-jaqty toqtaldy.
Birinshi. Oqý oryndary qurylysy.
Muǵalimder bilim sapasyn ǵana oılaýy úshin oqý oryndaryn júıeli túrde salý kerek. Bıyl mektep qurylysy qarqynynyń artýyna baılanysty úsh aýysymdy mektepter sanyn 8-den 4-ke deıin, toly rejımdegi mektepterdi 22-den 14-ke deıin azaıta aldyq.
5 jylǵa arnalǵan keshendi jospar aıasynda 50 memlekettik mektep qurylysyn josparlap qoıdyq. Buǵan qosa qosymsha oqý oryndary jekemenshik ınvestıtsııalar esebinen salynyp jatyr. Shaǵyn mektepter salýdan bas tartyp, iri mektepter salýǵa kóshtik.
Ekinshi. Baspana jaǵdaıy. Syıaqy.
Memleket basshysy «Pedagog mártebesi týraly» zań qabyldady. Bıylǵy 1 qańtardan bastap muǵalimderdiń jalaqysy 25% ósti, aldaǵy jyldary da eńbekaqy artady. Turǵyn úı sertıfıkattary tegin beriledi.
Qazaqstan ıpoteka kompanııasymen birlesip, bir myń áleýmettik páter tapsyramyz. Ony alýshylar qatarynda bilim salasynyń mamandary da bar. 2019 jyly muǵalimderge jataqhana salyp berdik.
Bıylǵy kúzde «Nur-Sultan qalasynyń qurmetti pedagogi» medali ıegerlerine de alǵash ret aqshalaı tólem engizdik. Ár ıegerge 830 myń teńgeden astam qarjy beriledi.
Úshinshi. Granttar. Biliktilikti arttyrý.
Túlekterimizdi qoldaımyz. «Muǵalim» mamandyǵy boıynsha granttar sanyn kóbeıttik. Tegin bilimge shamamen 900 grant bólindi.
«Sonymen qatar muǵalimderdiń biliktiligin arttyrýmen aınalysý qajet. Ondaǵan mektep salýǵa bolady, biraq balalardy qabyrǵa emes, ózimizdiń pedagogter oqytady. Biliktilikti arttyryp, tájirıbe almasý úshin semınarlar, sheberlik sabaqtaryn ótkizemiz. Kembrıdj ýnıversıtetimen birlesip, bes mektepte «Share» baǵdarlamasyn iske qostyq. Muǵalimder bul baǵdarlama boıynsha shetelde de jańa qajetti bilimmen sýsyndaýǵa múmkindik aldy. Baǵdarlamany kelesi jyly da jalǵastyramyz» dep atap ótti shahar basshysy.
Bıylǵy jyl pedagogter úshin ońaı bolmady. Muǵalimder qysqa merzimde oqytý formatyn ózgertip, oqýshylarǵa onlaın rejımde bilim berip jatyr.
9 jáne 11 synyp oqýshylary úshin bıylǵy oqý jyly bitiretin jyl ekenin eskerip, olar 3 toqsannan bastap aralas oqytý formatyna kóshetin boldy.
