Nur-Sultanda aldaǵy bes jyl ishinde 65-ten astam mektep salý josparlanyp otyr
NUR-SULTAN. QazAqparat - Elorda turǵyndarynyń sany jyldan jylǵa artyp keledi. Esepke sáıkes, 2030 jylǵa qaraı elordada 400 myńǵa jýyq oqýshy bolady. Olardy oqý oryndarymen qamtamasyz etý úshin jyl saıyn qalada kem degende 10 jańa mektep ashylý qajet. Bul týraly elorda ákimi Altaı Kólginov «Egemen Qazaqstan» gazetiniń tilshisine bergen suhbatynda málim etti.
«Halyq sany, sonyń ishinde oqýshylar sany da úderi ósýde. Máselen, 2010 jyly qalada 74 myń mektep oqýshysy bolǵan bolsa, qazir 193 myń oqýshy bar. Endi 10 jyldan keıin 2030 jyly, bul kórsetkish 400 000 oqýshyǵa deıin óspek. Endi soǵan sáıkes mektepter qurylysy da qarqyndy bolý kerek. Aldaǵy bes jyl ishinde 80 880 oqýshyǵa arnalǵan 67 mektep salý josparlanyp otyr», - dedi ákim.
Ol óz sózinde byltyr pandemııanyń órship turǵanyna qaramastan elordada 11 mektep jańadan boı túzegenin, bıyl taǵy 16 mekteptiń qurylysy júrgizilip jatqanyn aıtty.
Altaı Kólginov sóz arasynda ustazdardy yntalandyrý jumysy qalaı júrgizilip jatqanyn da qozǵap ótti.
«Bilim berý mekemelerin ǵımaratpen qana qamtý jetkiliksiz. Sapaly bilimdi arttyrý maqsatynda bolashaq pedagogtardy yntalandyrý úshin, orta bilim alýǵa jyl saıyn 800, joǵary bilim alýǵa taǵy 300 ákim grantyn bólý josparlanyp otyr. Sondaı-aq, balalardy mektepke deıingi bilimmen qamtý úlesi josparly túrde artatyn bolady», - deıdi Altaı Seıdiruly.
