Nur-Sultanda ákeler sleti ótti
NUR-SULTAN. QazAqparat - Shara aıasynda qatysýshylar áke tárbıesiniń qupııalarymen bólisti, dep habarlaıdy elorda ákimdiginiń resmı saıty.
400-den astam adam qatysqan slet qala ákimdigi men bilim basqarmasynyń uıymdastyrýymen ótti. Shara maqsaty - otbasy ınstıtýty men otbasyda tárbıe berýdegi áke rólin nyǵaıtý, rýhanı dástúrler men otbasylyq qundylyqtardy qaıta jańǵyrtý, saqtaý.
«Bul - dástúrli shara. Ol birneshe jyl qatarynan ótkizilýde. Búgin ol № 79 mekteptiń qabyrǵasynda uıymdastyryldy. Sharany ótkizý orny kezdeısoq tańdalǵan joq. Oqý ordasynyń ákimshiligi men qamqorlyq keńesi atalmysh baǵytta belsendi jumys isteıdi. Bizdiń ákeler keńesi daýly máselelerdi sheshýge qatysady, minezi aýyr jasóspirimdermen áńgimelesemiz, olarmen jumys isteımiz. Bul balalarǵa da oń áser etedi. Olar ózderiniń minezin ózgertedi. Minezi aýyr jasóspirimder arasynda devıanttyq minez tanytý tómendep keledi. Budan bólek, belsendi ákeler aǵash otyrǵyzýǵa, jóndeý júrgizýge kómektesedi. Mektep pen ata-analar arasyndaǵy tyǵyz qarym-qatynas ornaǵan kezde, eresekter óz ýaqytyn, nazaryn bólgen kezde, balalar úshin jaǵdaı utymdy bolady», - deıdi belsendi ákelerdiń biri Tımýr Qaldybaev.
Slet «Áke mahabbaty» prologymen, ákeler horynyń oryndaýyndaǵy «Atameken» ánimen bastaldy. Shara qatysýshylary «Baqytty áke - ómir salty» kórmesin tamashalap, № 79 mektep-lıtseı oqýshylarynyń óz ákelerimen ázirlegen startap-jobalarmen tanysty. TED-konferentsııa aıasynda spıkerler áke tárbıesiniń qupııalarymen bólisip, qazaqstandyq otbasylardyń problemalaryn talqylady, sol problemalardy jeńý joldaryn usyndy.
Budan bólek, «Rodıtelskıı chas» otbasylyq qonaq úıinde belsendi ákeler demalys kúngi klýbtyń, sýret stýdııasy men otbasylyq teatrdyń jumysymen tanystyrdy.
Shara sońynda eń belsendi ákelerge, aýdandyq sletterdiń jeńimpazdaryna dıplomdar men estelik syılyqtar tabystaldy.
Ákeler sleti «Talantty ata-analar, talantty balalar» festıvalimen aıaqtaldy.
