Nur-Sultanda Abaıtaný ǵylymı-tanymdyq ortalyǵy ashyldy
Mektep dırektory Aıgúl Ońdaǵanqyzy óz sózinde sharanyń uly aqynnyń 175 jyldyq mereıtoıyna oraı uıymdastyrǵanyn aıtyp ótti.
«Qazaqtyń uly oıshyly, bas aqyny Abaı atamyzdyń 175 jyldyq mereıtoıyna oraı ol kisiniń ǵıbratqa toly mol murasyn jas urpaqqa sýsyndatý maqsatynda Abaıtaný ǵylymı tanymdyq ortalyǵy ashylǵaly tur. Bul ortalyqty ashýdaǵy maqsatymyz – jas býynǵa, óskeleń urpaqqa uly aqynnyń taǵylymdyq muralaryn dáripteý. Jastarymyz Abaı atamyz aıtqandaı júregi jyly, qaıraty ystyq, aqyly nurly, bilimdi bolary sózsiz», - dedi ol.
Ákim orynbasary Baqtııar Máken, ata-analar qamqorshylary keńesiniń tóraǵasy Gúlnar Mansurqyzy jáne bala Abaı beınesin somdap júrgen mektep oqýshysy Іlııas Myqtybek ortalyqtyń lentasyn qıyp, saltanatty túrde ashty.
Ortalyqtaǵy eń qundy muranyń biri – Shákárim Qudaıberdiulynyń kelini Bátımanyń bórtpe shálisi.
«Búginge deıin biraz dúnıelerdi joǵaltyp aldyq. Ótken kúzde №87 mektepke uly aqynnyń esimi berilgen soń oqý ordasy janynan ǵylymı tanymdyq ortalyǵyn ashyp otyrmyz. Bul ortalyq endi úsh kezeńge bólinip jumys isteıtin bolady: «Bala Abaı», «Aqyn Abaı», «Hakim Abaı». Munda balalarǵa qajet dúnıeniń bári qoıyldy. Biz oqýshy qaýymǵa Abaıdyń aqyn bolyp qalyptasqanyn, onyń ákesi Qunanbaımen, ájesi Zeremen baılanysyn, onyń el arasyndaǵy tapqyrlyq ańyzdaryn aıtpaımyz. Biz Abaıdy birden aqyn etip túsire salǵanbyz. Mine osy balalardyń uǵynýyna qıyndyq týdyryp jatyr. Biz ár balanyń deńgeıine qaraı kezeń-kezeńine bólip qamtýymyz kerek», - dedi Jazýshylar odaǵynyń múshesi Almahan Muhamedqalıqyzy.
