Nur-Sultanda «Abaı mereıtoıy» kitabynyń tusaýy kesildi
NUR-SULTAN. QazAqparat – Elordada qazaqtyń uly aqyny Abaı Qunanbaıulynyń týǵan kúnine oraı «Abaı mereıtoıy» atty kitaptyń tusaýkeser rásimi ótti, dep habarlaıdy QazAqparat tilshisi.
L.N. Gýmılev atyndaǵy Eýrazııa ulttyq ýnıversıteti aıtýly aqynnyń týǵan kúnine oraı uıymdastyrylǵan «Adamzattyń bárin súı, baýyrym dep» atty onlaın dáris- kontsertiniń aıasynda «Abaı mereıtoıy» atty kitaptyń tusaýy kesildi.
«Osyndaı aıtýly data álemdi jaılaǵan indettiń saldarynan onlaın túrde ótip jatyr, ókinishti. Degenmen rýhymyz myqty. Abaı sekildi uly aqynnyń týǵan kúni Qazaqstan ǵana emes, álemdik deńgeıde atalyp ótip jatyr. Onyń dáleli búgingi sharany tek qazaqstandyqtar ǵana emes álemniń túkpir-túkpirindegi qandastarymyz tamashalap otyr. Ótken jyly Memleket basshynyń Jarlyǵymen Abaı kúni keń aýqymda atalyp ótti. Mereıtoı onymen bitken joq, bıyl da jalǵasyn tabýda. Biz de óz tarapymyzdan bir kisideı atsalysyp jatqan jaıymyz bar», - dedi «Otandastar» AQ-nyń vıtse-prezıdenti Maǵaýııa Sarbasov aıtýly sharada.
Avtorlardyń málimdeýinshe, kitapqa ABAI TV telearnasynyń ashylýy, ǵylymı konferentsııalar men sımpozıýmdar, mereıtoılyq monetalar men markalar, shetelderdegi Abaı eskertkishteri, saıabaqtar, kósheler men mádenı-aqparattyq ortalyqtardyń ashylýy sııaqty mereıtoı jylynda atqarylǵan mańyzdy oqıǵalar engen.
Sondaı-aq, atalǵan sharada Abaı shyǵarmalarynyń japon, koreı, túrik, aǵylshyn, qyrǵyz, portýgal, arab, ıtalıan, qytaı jáne álemniń basqa da kóptegen tilderine aýdarylyp shyǵatyny aıtyldy.
Buǵan deıin elordada Abaı kúnine arnalǵan halyqaralyq onlaın dáris-kontserti ótip jatqany habarlandy.
