Nur-Sultanda 70-ten astam saýda úıi tekserilip, 30 nysanǵa eskertý jasaldy
NUR-SULTAN. QazAqparat – Elordada qaıta ashylǵan saýda ortalyqtaryndaǵy sanıtarlyq talaptar tekserilip jatyr, dep habarlaıdy QazAqparat tilshisi.
«Búgin biz taǵy bir monıtorıng jumysyn júrgizdik. Mundaı tekserýler saýda oryndary qaıta ashylǵan sátten beri júrgizilip keledi. Monıtorıng tobynyń negizgi mindeti - bas memlekettik sanıtarlyq dáriger belgilegen sanıtarlyq talaptardyń saqtalýyn baǵalaý. Bir ǵana 20-24 mamyr aralyǵynda tórt aýdannyń monıtorıngtik toby 70-ten astam nysandy tekserdi. Onyń ishinde 30 nysanǵa eskertý berildi. Keıbirinde teplovızor bolmaǵan, keıbir qyzmetkerler maska taqpaǵan. Esep jýrnaly júrgizilmegen nemese tazalyq jumysy jasalmaǵan nysandar boldy. Bir qaýipsizdik talaptaryna saı kelmegeni úshin jabyldy», - dedi elordalyq Investıtsııalar jáne kásipkerlikti damytý basqarmasynyń Saýda jáne qyzmet kórsetý bóliminiń bas mamany Azamat Rashıtov reıd barysynda.
Spıker qalanyń tórt aýdanynda tórt baqylaý toby jumys isteıtinin jáne eskertý berilgen nysandardyń qaıta tekseriletinin atap ótti.
«Sanıtarlyq talaptardyń buzylýynyń aldyn alý úshin kún saıyn ondaǵan reıd ótkizemiz. Bul jumystar áli de jalǵasady. Qaladaǵy jaǵdaı ázirge turaqty. Arnaıy jospar boıynsha saýda nysandaryna baramyz jáne eskerý jasalǵan nysandardy qaıta tekseremiz, ikomek-tiń 109 nómirine nemese ákimdikke kelip túsken shaǵymdardy qaraımyz. Máselen, elordanyń Almaty aýdanyndaǵy «Sáýle» saýda úıine buǵan deıin eskertý jasalǵan edi. Búgin onda kelýshilerdiń barlyǵynyń maskamen júrgenin jáne teplovızor men sanıtaızerler ornatylǵanyn kórip otyrmyz. Jeldetý júıesi iske qosylǵan. Bizdiń mindetimiz - sanıtarlyq talaptardyń oryndalýyn qadaǵalaý», - dedi ol.
Sonymen birge, Almaty aýdany Qyzmet sapasy men qaýipsizdigin baqylaý basqarmasynyń bas mamany Asqar Saǵynaev saýda nysandaryna qandaı talap qoıylatynyn túsindirdi.
«Kún saıyn qyzmetkerler men kelýshilerdiń dene qyzýy ólshenýi kerek. Tańerteń jáne keshke qyzmetkerlerdiń dene temperatýrasy arnaıy esep jýrnalyna jazylyp otyrýy tıis. Kireberiste qolǵa jaǵatyn sanıtaızer turýy mindetti. Arnaıy jaýapty adam bárin baqylap, kelýshilerge sanıtarlyq talaptardy túsindirýi kerek. Kelýshiler de, qyzmetkerler de maskada bolýy qajet», - dedi A. Saǵynaev.
Óz kezeginde «Sáýle» saýda úıiniń ókili de jaǵdaıdy túsindirdi.
«Buǵan deıin kelýshilerdiń dene qyzýyn ólsheý boıynsha eskertý jasaldy. Sosyn bir qyzmetkerimizde maska bolmaǵan. Jalpy, basqa erejelerdi saqtap kelemiz. Tazalyq jumysy kúnine eki ret júrgiziledi. Qyzmetkerlerdiń dene qyzýy ólshenip, arnaıy jýrnalǵa jazylady. Jýý quraldary da jetkilikti kólemde bar», - dedi «Sáýle» saýda úıi ákimshisiniń kómekshisi Gaýhar Ermaǵambetova.
Aıta keteıik, 20 mamyrdan bastap Nur-Sultan men Petropavl qalalarynda saýda, oıyn-saýyq ortalyqtary men qoǵamdyq monshalar qaıta ashyldy. Biraq, oıyn-saýyq alańdary, fýdkorttar, kınoteatrlar ázirge iske qosylmaıdy.
