Nur-Sultanda 692 medıtsına qyzmetkeri qonaq úıge ornalasyp, qyzmetin atqarýda
NUR-SULTAN. QazAqparat – Nur-Sultan qalasynyń qoǵamdyq densaýlyq saqtaý basqarmasynyń basshysy Sáýle Qısyqovanyń aıtýynsha elordada koronavırýs ınfektsııasy alǵash tirkelgen sátten bastap 48 nysan karantınge jabylǵan, dep habarlaıdy QazAqparat tilshisi.
«Elordada koronavırýs ınfektsııasynyń taralýyna jol bermeý úshin birqatar shara qabyldanyp jatyr. Sondaı sharalardyń biri – medıtsına qyzmetkerlerin qalanyń qonaq úılerine ornalastyrý. Qazirgi ýaqytta 692 medıtsınalyq qyzmetker qonaq úılerde. Demalǵannan keıin qaıtadan bári jumysqa barady», - dedi Sáýle Qısyqova «Habar 24» arnasynda onlaın rejımde ótken baspasóz máslıhatynda.
Basqarma basshysy keltirgen málimetke sáıkes, qalada koronavırýs juqtyrǵan azamattarmen baılanysta bolǵan 4 129 adam anyqtalǵan. 309 vırýs oshaǵynda dezınfektsııalyq jumystar júrgizilgen.
«Qalada koronavırýs ınfektsııasy alǵash tirkelgen sátten bastap 48 nysan karantınge jabyldy. Olardyń ishinde turǵyn úı keshenderi, ákimshilik mekemeler men ózge de nysandar bar. Olardyń ishinde 26 nysanda karantın aıaqtaldy. Búgingi kúni 22 nysan áli karantınde. Karantınge jabylǵandardyń ishinde - aıtýynsha «Sharapat» áleýmettik qyzmet kórsetý ortalyǵy da bar», - dedi ol.
Basqarma basshysy sonymen qatar qalanyń jekelegen bólikterinde shekteý engizý týraly qaýly shyqqanyn aıtyp ótti.
«Qalada 9 úı karantın qorshaýyna alyndy. Karantındik aýmaqtarda búgin áskerılermen birge 200-ge tarta adam dezınfektsııa jumystaryn júrgizdi. 2 800 úıde de dezınfektsııa jasaldy. Epıdemıologııalyq ahýal baqylaýda», - dep túıdi Sáýle Qısyqova.
Aıta ketsek, buǵan deıin Sáýle Qısyqova elordada qazirgi tańda koronavırýs ınfektsııasyn juqtyrǵan 9 adam aýyr halde jatqanyn málim etken edi.
