Nur-Sultanda 6-7 jeltoqsan kúnderi aýa sapasy shekten tys lastandy
NUR-SULTAN. QazAqparat - «Qazgıdromet» RMK ekologııalyq monıtorıng stantsııalary 2020 jylǵy 6-7 jeltoqsan kúnderi Nur-Sultan qalasynda aýadaǵy lastaýshy zattardyń shekti-ruqsat etilgen normadan (ShRSh) asyp ketý jaǵdaılaryn tirkedi.
Kásiporyn taratqan málimetterge qaraǵanda, ShRSh «asyp ketýi» 6 jeltoqsan saǵat 19.00-den bastap tirkeldi:
1) RM-2,5 ólshengen bólshekter boıynsha: 5,2 ShRSh-ǵa deıin asyp ketýdiń 246 jaǵdaıy;
2) RM-10 ólshengen bólshekter boıynsha: 2,2 ShRSh-ǵa deıin asyp ketýdiń 161 jaǵdaıy;
3) Kómirtegi oksıdi: 1,8 ShRSh-ǵa deıin asyp ketýdiń 55 jaǵdaıy;
4) Kúkirtsýtegi: 2,5 ShRSh-ǵa deıin asyp ketýdiń 55 jaǵdaıy;
5) Kúkirt dıoksıdi: 1,1 ShRSh-ǵa deıin asyp ketýdiń 3 jaǵdaıy;
6) Azot oksıdi: 1,2 ShRSh deńgeıinde asyp ketýdiń 1 jaǵdaıy tikeldi.
Atmosferalyq aýanyń lastanýy barlyq baqylaý beketteri boıynsha baıqaldy. Eń joǵary lastaný Kóktal-1 aýdandarynda, Turan dańǵyly men Túrkistan kóshesinde tirkeldi.
2020 jylǵy 7 jeltoqsanda elordanyń aýa raıyna antıtsıklon áser etedi. Aýa raıy negizinen jaýyn-shashynsyz, 24-28ºS-qa deıin birqalypty aıaz bolyp, tuman baıqalady. Mundaı aýa raıy jaǵdaılary joǵary qysym aımaǵyna tán – jel turmaıdy, aýa salqyn bolady, azdaǵan bult torlaıdy. Atmosferanyń joǵarǵy qabatynda aýa massalarynyń aralaspaýy tumannyń paıda bolýyna áser etedi.
2020 jylǵy 6 jeltoqsan kúni 13 saǵat 55 mınýtta 7 jeltoqsanda Nur-Sultanda keı ýaqytta tuman túsetini týraly eskertý jarııalanǵan bolatyn.
«Mundaı meteorologııalyq jaǵdaılar (aıaz – 25 gradýs jáne jelsiz aýa raıy) qalanyń jeke sektoryn jylytýdan shyǵatyn lastaýshy zattardyń aýada jınalýyna yqpal etti. Nátıjesinde qalyń tútin paıda boldy»,-delingen habarlamada.
