Nur-Sultanda 5 jyl buryn taksı júrgizýshisin óltirgen kúdikti ustaldy
Baspasóz qyzmetiniń málimetterine qaraǵanda, Kókshetaýda arnaıy is-shara júrgizý barysynda adam óltirdi degen kúdik boıynsha 27 jastaǵy er adam ustaldy.
2017 jyldyń tamyzynda kúdiktiniń bazarlardyń biriniń janynda «Daewoo-Nexia» jekemenshik taksıin jaldap, «Lesozavod» aýdanyna qaraı shyqqany anyqtaldy. Kórsetilgen orynǵa kelgennen keıin júrgizýshi men jolaýshynyń arasynda jol aqysynyń quny úshin janjal shyqqan. Taksı júrgizýshisi qyzmetiniń qunyn 1 myń teńgege baǵalaǵan. Sózge kelispeı qalǵan jolaýshy pyshaq alyp shyǵyp, júrgizýshige 17 jerden pyshaq salǵan. Sonyń saldarynan júrgizýshi oqıǵa ornynda mert bolǵan. Adam ólimi oryn alǵannan keıin qylmysker izin jasyrýǵa tyrysyp, mashınada qalǵan saýsaq izderin muqııat súrtken.
Asa aýyr qylmys jasaǵan kúdikti qylmys jasalǵan orynnan jasyrynǵan jáne birneshe kúnnen keıin kórshiles respýblıkaǵa shyǵyp ketken.
5 jyl boıy elordalyq jedel qyzmetkerler adam óltirdi dep kúdik keltirilgen adamnyń kim ekenin anyqtaý boıynsha kóptegen jumys júrgizgen. Krımınalıster qylmys ornynan tabylǵan barlyq izderdi zerttedi.
2 jyl ótkennen keıin avtokóliktiń júksalǵyshynan alynǵan saýsaq izderin zertteı otyryp, krımınalıster sáıkestikti anyqtaǵan. Alaıda tergep-tekserý júrgizý barysynda saýsaq izderi qaıǵyly oqıǵa bolǵanǵa deıin biraz ýaqyt buryn júrgizýshi barǵan janar-jaǵarmaı quıý stantsııasy qyzmetkerine tıesili ekeni anyqtalǵan, izdestirý jalǵasyn tapqan.
Ótken jyldyń sońynda krımınalıster saýsaq izi boıynsha taǵy bir sáıkestikti anyqtaǵan jáne qaıtadan belsendi tekseris bastalǵan. Saýsaq izi ıesiniń 2014 jyly Belarýs Respýblıkasynda urlyq jasaǵany úshin sottalǵany anyqtaldy. Ol Aqmola oblysynyń turǵyny bolyp shyqqan.
«Tekseris júrgizý barysynda jedel qyzmetkerler onyń adam óltirýge qatysy bar ekenin anyqtaǵan. Ustalǵannan keıin bultartpaıtyn aıǵaqtardyń nátıjesinde kúdikti istegen isin moıyndaǵan. Qazirgi ýaqytta ol Nur-Sultan qalalyq PD Ýaqytsha ustaý ızolıatoryna qamaldy. Qazaqstan Respýblıkasy QK-niń 99-baby boıynsha sotqa deıingi tergep-tekserý júrgizilýde»,-delingen habarlamada.