Nur-Sultanda 39 kásipkerlik nysany «Ashyq» pılottyq jobasyna qatysyp jatyr
NUR-SULTAN. QazAqparat – Nur-Sultan qalasynda «Ashyq» ilki jobasyna 39 kásipkerlik nysany qatysýda. Bul týraly Nur-Sultan qalasynyń bas memlekettik sanıtarlyq dárigeri Sarhat Beısenova aıtyp berdi, dep habarlaıdy QazAqparat tilshisi.
«Koronavırýs ınfektsııasynyń taralýynyń aldyn alý jáne shekteý sharalaryn engizý kezeńinde kásipkerlik nysandaryn qoldaý maqsatynda Nur-Sultan qalasynda «Ashyq» pılottyq jobasyn iske asyrý bastaldy. Joba fıtnes-klýbtarda, spa-ortalyqtarda, saýnalar men basseınderde, kompıýterlik klýbtarda jáne boýlıng klýbtarda júzege asyrylady. Búgingi tańda Nur-Sultan qalasynda pılottyq jobaǵa 39 kásipkerlik nysany qatysýda», - S. Beısenova elorda ákimdiginde ótken onlaın brıfıngte.
Spıkerdiń aıtýynsha, qosymsha qaýipsizdik sharalaryn qamtamasyz etedi.
«Monıtorıngtik toptardyń qyzmetkerleri birneshe ret ózin-ózi oqshaýlaý jáne úı karantıni rejımin buzý faktilerine tap boldy. Naýqas nemese olarmen qatynasta bolǵan adamdar sanıtarlyq dáriger nusqaýlaryn buzyp, qoǵamdyq oryndarǵa barady, osylaısha vırýstyń taralý qaýpin týdyrady. Bul joba «Ashyq» pılottyq jobasyna qatysatyn nysandarǵa kirgende kelýshiniń COVID mártebesin bilýge múmkindik beredi jáne tek úıde ózin-ózi oqshaýlaý rejımin buzatyn adamdardy anyqtaýǵa baǵyttalǵan», - dep túsindirdi S. Beısenova.
«Ashyq» mobıldi qosymshasyn App Store jáne Play Market arqyly júkteýge bolady. Nysannyń QR-kodyn skanerlep, sodan keıin JSN engizý kerek. QR-kodtardy paıdalaný jáne koronavırýsqa arnalǵan testterdiń jalpy bazasymen ıntegratsııalaý arqyly pılottyq joba nysan kelýshisiniń mártebesin anyqtaıdy.
«Jasyl» mártebe kelýshiniń derekter bazasynda COVID-19 teris nátıjesimen PTR-testileýden ótkenin bildiredi. «Kók» mártebe – PTR-testileý nátıjesi joq, COVID-19 naýqasymen baılanyspaǵan. «Sary» tús – derekter bazasynda COVID-19 naýqaspen baılanysta bolǵanyn bildirse, «qyzyl» tús –COVID-19 boıynsha bazada oń nátıjemen tirkelgenin kórsetedi. Kelýshide smartfon bolmaǵan jaǵdaıda, kásipkerlik nysannyń qyzmetkeri kelýshiniń mártebesin óz kelisimimen aqparattyq júıede tekseredi», - deıdi S. Beısenova.
Aıta keteıik, elordada COVID-19 aýrýy qańtar aıymen salystyrǵanda 33,8%-ǵa tómendedi. Táýligine shamamen 68 ınfektsııa juqtyrý jaǵdaıy tirkeledi, onyń ishinde 37 jaǵdaı sımptomdy, 31-i sımptomsyz túrde.
Qalada kóbinese 30-39 jastaǵy adamdar basym aýyrady, olar 24,8% quraıdy. 50 jastan asqan adamdar – 23,5 % bolsa, balalardyń jalpy syrqattanýshylyqtaǵy úlesi – 14,9% quraıdy.
