Nur-Sultanda 29 qańtardan bastap boran basylady - Qazgıdromet
NUR-SULTAN. QazAqparat - «Qazgıdromet» RMK aýa raıyn qysqa merzimge boljaý basqarmasynyń basshysy Alýa Sahanova aldaǵy kúnderi boran basylatynyn aıtty, dep habarlaıdy QazAqparat tilshisi.
«22-24 qańtar aralyǵynda «Qazgıdromet» eskertý jarııalaǵan bolatyn. Ol jerde qar jaýatyny jáne ońtústik-batystan sekýndyna 15-20, 23-28 metr jyldamdyqpen jel soǵatyny aıtylǵan. 26-27 qańtar kúnderi qatty jel soǵyp, 6 mılımetr qar jaýdy», - dedi Alýa Sahanova qalalyq ákimdikte ótken brıfıngte.
Sondaı-aq, ol 29 qańtardan bastap soltústik-batys antıtsıklony men aýa temperatýrasynyń tómendeýine baılanysty jaýyn-shashyn toqtaıtynyn aıtty.
«29 qańtar kúni túnde qar jaýyp, tuman tússe, 30 qańtar kúni ara-tura tuman bolyp, túnde -26 -28, al kúndiz -16 -18 gradýs aıaz bolady», - deıdi ol.
