Nur-Sultanda 2826 saılaý komıssııasynyń múshesi jumys isteıdi

NUR-SULTAN. QazAqparat -  Qalanyń saılaý ýchaskelerinde 2826 saılaý komıssııasy jumys isteıdi. Olardyń 1109-y saıası partııalardyń múshesi bolsa, 1399 - qoǵamdyq birlestikterdiń ókili, sondaı-aq 318 adam joǵary saılaý komıssııalary tarapynan usynyldy, dep habarlaıdy QazAqparat elorda ákimdiginiń saıtyna silteme jasap.

Saılaý komıssııasy músheleriniń qataryna bıýdjettik uıymdardyń qyzmetkerleri, saıası partııalar men ÚEU, kommertsııalyq qurylymdardyń ókilderi, zeınetkerler, ózin-ózi jumyspen qamtyǵan azamattar, stýdentter jáne túrli mekemelerdiń qyzmetkerleri kirdi.

Elordada 238 saılaý ýchaskesi tirkelgen, onyń 204-i - ashyq, al 34-i - jabyq. Ýchaskelik saılaý komıssııalarynyń sandyq quramy saılaýshylardyń sanyna baılanysty 5-ten 11 adamǵa deıin anyqtalady. Saılaý komıssııalarynyń músheleri Prezıdentti saılaý jónindegi tıisti is-sharalardy ótkizedi jáne saılaý kúni ýchaskelerde daýys berýdi uıymdastyrady. Árbir saılaý ýchaskesinde saıası partııalar men qoǵamdyq birlestikterden 2 baqylaýshy jumys isteıdi. Qazirgi ýaqytta baqylaýshylar tiziminde qoǵam ókilderi, úkimettik emes uıymdar músheleri jáne elorda turǵyndarynan quralǵan 500 adam bar. Budan bólek «Dýman» qonaq úıinde 18 maýsymǵa deıin jumys isteıtin halyqaralyq baqylaýshylar men sheteldik buqaralyq aqparat quraldarynyń ókilderine járdemdesý ortalyǵy ashyldy.