Nur-Sultanda 27 eldiń elshisi jańa saıabaqqa aǵash otyrǵyzdy
«Qazaqstan Táýelsizdiginiń jáne Azııadaǵy ózara is-qımyl jáne senim sharalary keńesiniń 30 jyldyǵy qarsańynda búgingi sharanyń sımvoldyq máni bar dep oılaımyn. Bul uıym halyqaralyq qatynastardaǵy kúrdeli máselelerdi sheshýdegi mańyzdy halyqaralyq platforma retinde bekitildi. AÓSShK bes negizgi ólshem boıynsha jumys isteıdi: áskerı qaqtyǵystardy boldyrmaý, soǵan senim sharalaryn qabyldaý, ekonomıkalyq baǵyt, ekologııalyq baǵyt, adamı baǵyt jáne jańa tegeýrinder men syndar. Búgingi sharany ǵalamshardaǵy ómirdi jaqsartý úshin memleketter birlesken qadam jasaıtyn adamı ólshemniń kórsetkishi dep atar edim. AÓSShK fılosofııasy da osy. Alleıaǵy jyl saıyn kelýdi josparlap otyrmyz. Kelgen qonaqtar men delegatsııalardy da osy alleıaǵa ákelemiz «, - dedi AÓSShK hatshylyǵynyń atqarýshy dırektory Qaırat Sarybaı alleıanyń ashylýynda.
Qazaqstannyń ekologııalyq uıymdary qaýymdastyǵynyń basqarma tóraǵasy Aıgúl Soloveva alleıanyń ashylýyn elordanyń damýyna qosqan erekshe úles dep baǵalady.
«Búgin alleıanyń alǵashqy aǵashtary otyrǵyzyldy. Oǵan 27 memlekettiń ókilderi bas qosty. Alleıanyń Beıbitshilik jáne kelisim saraıynyń mańynda ashylýy da tegin emes, osyndaı sharalar arqyly memleketterdiń yntymaǵy arta túsedi. Bul – qalany odan ári kógaldandyrýǵa yntalandyratyn, elordamyzdyń damýyna qosqan erekshe úles. Aldaǵy ýaqytta da aǵash ekken árbir memleket elshileri alleıada serýendep, aǵashtardy sýarady dep oılaımyn», - dep atap ótti Aıgúl Soloveva.
Elshilerge aǵash otyrǵyzýǵa «Jas Ulan» balalar men jasóspirimder uıymynyń eriktileri kómektesken.
«Bizdiń jumysymyzdyń bir baǵyty – óskeleń urpaqqa ekologııalyq tárbıe berý. Sońǵy aıda biz «taza kólder», «taza saıabaq» aktsııalaryn ótkizdik, elimiz boıynsha 3,5 myńnan astam kóshet otyrǵyzdyq, 80 myńnan astam jastardy eko-baǵytta biriktirdik», - dep atap ótti «Jas Ulan» tóraǵasy Dınara Sádýaqasova.
