Nur-Sultanda 26 myńnan astam bala 1-synypqa barady
NUR-SULTAN. QazAqparat - Elordada 26 myńnan astam bala 1-synypqa barady. Bul týraly Nur-Sultan qalalyq bilim basqarmasynyń basshysy Sholpan Qadyrova aıtty, dep habarlaıdy QazAqparat tilshisi.
«Elordada ártúrli úlgidegi 399 mektepke deıingi uıym jumys isteıdi. Barlyq balabaqsha 17 tamyzdan bastap kezekshilik top rejıminde jumysyn qaıta bastady. Búgingi kúni qala boıynsha balabaqshalarǵa 8 myńnan astam bala baryp júr. Bul - bizdiń tárbıelenýshilerdiń 15 paıyzy. Mektepke deıingi uıymdarda kezekshi toptardyń jumys isteý rejımi boıynsha balalar men qyzmetkerler, sondaı-aq ata-analar úshin jumys algorıtmi qurastyrylǵan», - dedi ol Ortalyq kommýnıkatsııalar qyzmetindegi baspasóz máslıhatynda.
Onyń atap ótýinshe, búgingi tańda Nur-Sultan qalasynda orta bilim beretin 117 mektep jumys isteıdi. Buǵan qosa bıylǵy oqý jylynda 3 jańa mektep ashylady dep josparlanǵan. Onyń ekeýi - jalpy orta mektep bolsa, bireýi - múmkindigi shekteýli balalarǵa arnalǵan arnaýly mektep sanalady.
«Elorda boıynsha oqý jylynyń basynda mektep oqýshylarynyń sany 202 myńnan asady dep boljap otyrmyz. 1-synypqa 26 myńnan astam oqýshy qabyldanady. Búgingi kúni 23 164 ótinish berildi», - dedi departament basshysy.
Sholpan Qadyrovanyń aıtýynsha, oqý protsesi QR Bilim jáne ǵylym mınıstrliginiń ádistemelik usynymdaryna sáıkes júrgiziledi.
