Nur-Sultanda 22 myń jumys orny ashyldy
NUR-SULTAN. QazAqparat – Bıyl elordada 22 myń jumys orny ashyldy. Bul týraly QR Premer-mınıstriniń orynbasary Berdibek Saparbaev málim etti, dep habarlaıdy QazAqparat tilshisi.
«Bıylǵy jyldyń 11 aıynda el ekonomıkasynyń damý qarqyny ótken jyldyń osy ýaqytymen salystyrǵanda 4,4 paıyzǵa ósken. Sonyń nátıjesinde halyqtyń tabysy 5,7 paıyzǵa artty. Osy 11 aıdyń ishinde el ekonomıkasyn damytýǵa 10 trln 8 mlrd teńge tartyldy. Odan bólek, el kóleminde 400 myń jańa jumys orny ashyldy. Onyń ishinde 22 myń jumys orny elordada ashyldy», - dedi Berdibek Saparbaev elordalyqtarmen kezdesýde.
Onyń aıtýynsha, jumyssyzdyq kórsetkishin azaıtý - Memleket basshysy tapsyrmalarynyń biri.
«Bıylǵy jyldyń 11 aıynda Qazaqstanda jumyssyzdyq deńgeıi 4,8 paıyz, al Nur-Sultan qalasy boıynsha, 4,5 paıyzdy quraıdy. Jalpy áleýmettik máselelerdi sheshýge jyl sanap erekshe mán berilýde. Aıta ketsek, byltyr bul salaǵa memlekettiń bıýdjettiń 43 paıyzy baǵyttalsa, bıyl ol 45 paıyzǵa kóterildi. Al kelesi jyly bul kórsetkish 50 paıyzǵa artady», - deıdi ol.
Aıta ketsek, QR Premer-mınıstriniń orynbasary Berdibek Saparbaev, QR Eńbek jáne halyqty áleýmettik qorǵaý mınıstri Birjan Nurymbetov, QR Densaýlyq saqtaý mınıstri Eljan Birtanov jáne qala ákimi Altaı Kólginov elorda turǵyndarymen kezdesý ótkizdi. Kezdesýde azamattar ózderin suraqtaryna jaýap aldy.
