Nur-Sultanda 21 ýchaskede shomylýǵa tyıym salynǵan

NUR-SULTAN. QazAqparat - Nur-Sultanda sý aıdyndarynyń 21 ýchaskesinde shomylýǵa tyıym salynǵan. Bul týraly onlaın brıfıngide qalalyq Tótenshe jaǵdaılar departamenti Azamattyq qorǵanys basqarmasynyń bastyǵy Ratbek Demeýbergen aıtty, dep habarlaıdy QazAqparat.

Astanada shomylýǵa tyıym salynǵan 21 ýchaske bar. Olardyń qatarynda – Shubar, Gazmashapparatýra jáne Telman turǵyn alabyndaǵy, Trıatlon parki, Depýtattyq qalashyq mańyndaǵy Esil ózeni, sondaı-aq Qarasý ózeni, Aqbulaq ózeni, Nura-Esil arnasy jáne taǵy basqasy bar.

Sýǵa túsýge ruqsat etilgen 3 ýchaske: «Ortalyq qalalyq jaǵajaı», «Trı peskarıa» jáne «Astanalyq aýla» demalys aımaqtary.

Sondaı-aq qazir Sh.Beısekova kópiri janyndaǵy ornalasqan kommýnaldyq jaǵajaıǵa qatysty ákimdik qaýlysyna tolyqtyrý engizý jumysy bastaldy.

Sýǵa shomylý maýsymy bastalǵaly qutqarýshylar kúsheıtilgen rejımde jumys istep jatyr. Alaıda mamandar usynysyna qulaq aspaı, belgilenbegen jerde shomylý azaıar emes.

«Atqarylǵan jumystarǵa qaramastan, búginge deıin elordanyń sý aıdyndarynda 3 adam sýǵa ketti, onyń úsheýi de – bala. Byltyr osy aralyqta 2 adam sýǵa ketip, kóz jumdy, onyń ishinde bireýi – bala. Qaza bolý faktileri sýǵa shomylýǵa tyıym salynǵan jáne arnaıy jabdyqtalmaǵan sý aıdyny aýmaǵynda tirkelgen. 2022 jyly 4 adam qutqaryldy. Alaıda serýendeýge shyqqandar qutqarý qyzmetkerleriniń eskertýin elemeı, olarǵa daýys kóterip, namysyn taptaıtyndar, sol sııaqty tyıym salý belgileri men stendterdi buzatyndar bar», - dedi Ratbek Demeýbergen.