Nur-Sultanda 18 jastaǵy jigit bir túnde eki kólik urlap, ustaldy

NUR-SULTAN. QazAqparat - Jas jigit bir tún ishinde turǵyn úılerdiń aýlasynan eki kólik urlaǵan, dep habarlaıdy QazAqparat Nur-Sultan qalasynyń Polıtsııa departamentiniń baspasóz qyzmetine silteme jasap.

Kúdikti aldymen Mustafın kóshesinde VAZ-2114 avtokóligin buzyp kirip, aıdap ketken. Birneshe metr júrgesin, jas jigit oıyn ózgertken. Sol boıda kóligin tastap, ketip qalǵan. Jol-jónekeı «Toıota Karına» markaly avtokóligine kózi túsken. Urlanǵan kólikpen azdap qydyrǵasyn jigit ony saıabaqta qaldyrǵan.

Polıtsııa qyzmetkerleri izin sýytpaı 18 jastaǵy qala turǵynyn ustady. Ustalǵan azamattyń aıtýynsha, avtokólikti urlaý tásilderin ol ınternet jelisinen úırengen, sóıtip alǵan «bilimin» is júzinde paıdalanyp kórgisi kelgen.

Jas jigitke qatysty avtokólikti urlaý maqsatynsyz zańsyz ıelený faktisi boıynsha tergeý júrgizilýde. Avtokólikter ıelerine qaıtaryldy.

Nur-Sultan qalasynyń polıtsııa departamenti azamattardy kólikti qoıǵanda saq bolýǵa, esik-terezeleriniń jabylǵanyn tekserý kerektigin eskertedi.

«Kóligińizdi aıdap áketýden saqtaý jáne onyń qaýipsizdigin qamtamasyz etý úshin polıtsııa qyzmetkerleri avtokólik ıelerine mashınalardy kúzetiletin turaqtarǵa qoıýdy jáne dabyl júıesin ornatýdy usynady. Eger sizge qatysty zańsyz áreketter jasalsa, dereý 102 nómiri boıynsha habarlańyz»,-delingen habarlamada.