Nur-Sultanda 11 avtobýstyń qozǵalys baǵyty ózgeredi
NUR-SULTAN. QazAqparat – Elordada 11 qoǵamdyq kóliktiń baǵytyna ózgeris engizilmek, dep habarlaıdy QazAqparat tilshisi.
«Baǵdar júıesin jańartýǵa qatysty aıtar bolsaq, bıyl birqatar usynys berdik. Sonyń biri – baǵdar shemalaryn týralaý. Ózderińiz biletindeı keıbir avtobýs kóshelerdi aınalyp baryp qozǵalady. Máselen №12 avtobýstyń baǵdarynda sondaı sıpat bar. Ol qoǵamdyq kólik Qabanbaı kóshesimen kele jatyp, Turan dańǵylyna túsý úshin Mınıstrlikter úıin aınalyp barady. Osy jaǵdaı jolaýshylardyń birazynyń kóńilinen shyqpaı júr. Sol sebepti atalǵan baǵdardyń qozǵalysyn týralaý týraly usynys berdik. Osylaısha qozǵalys ýaqyty da, ıntervaly da qysqarady», - dedi CTS kompanııasy basshysynyń orynbasary Baýyrjan Seıitov «Elordadaǵy qoǵamdyq kólik keshenin damytý: keshe, búgin, erteń» atty kórme-konferentsııasynda.
Onyń aıtýynsha, №12 avtobýspen qatar, qaladaǵy dál osyndaı 11 qoǵamdyq kóliktiń qozǵalysyna ózgeris engizilmek. Olar: № 2, 7, 18, 33, 40, 46, 51, 52, 61 jáne 81-baǵdarlar.
Eske sala ketsek, búgingi kórme-konferentsııa barysynda CTS kompanııasynyń basshysy Bekmyrza Igenberdınov elordada kámeletke tolmaǵan balalar qalaishilik qoǵamdyq kólikpen tegin júretinin habarlaǵan edi. Sonymen qatar halyqtyń alty sanatyna kiretin azamattarǵa qala mańy baǵdary boıynsha qoǵamdyq kólik tegin bolady. Ol alty sanattyń ishine zeınetkerler, múgedekter, UOS ardagerler, múgedekterdi alyp júrgen adamdar, kópbalaly analar jáne kópbalaly otbasylardyń músheleri kiredi.
