Nur-Sultanda 10 myńǵa jýyq dáriger men muǵalimderge vaktsına salyndy
NUR-SULTAN. QazAqparat – Elordada 4 650 medıtsına qyzmetkeri men 1 799 muǵalimge vaktsına salyndy. Bul týraly Nur-Sultan qalasy qoǵamdyq densaýlyq saqtaý basqarmasynyń basshysy Tımýr Muratov aıtyp berdi, dep habarlaıdy QazAqparat tilshisi.
Halyqty koronavırýs ınfektsııasyna qarsy vaktsınalaý jalǵasýda. Búgingi kúni 9 988 adam vaktsınatsııadan ótti, onyń ishinde: 4 650 medıtsına qyzmetkeri, 1 799 muǵalim bar. Ekpe alǵannan keıin densaýlyqtyń nasharlaý jaǵdaılary bolǵan joq», - dedi T. Muratov elorda ákimdiginde ótken onlaın brıfıngte.
Alǵashqy medıtsınalyq-sanıtarlyq kómek kórsetýdiń 36 uıymynda birinshi jáne ekinshi komponentterge arnalǵan 2 vaktsınatsııa bólmeleri, vaktsınatsııadan keıin patsıentti baqylaýǵa arnalǵan kútý bólmeleri turaqty jumys isteıdi.
«Barlyq emhanalarda tońazytqysh qondyrǵylary, vaktsınalardy qoımadan ekpe salý mekemesine tasymaldaýǵa arnalǵan termııalyq konteınerler bar. Vaktsınalar barlyq sanıtarııalyq-epıdemıologııalyq talaptarǵa saı saqtalady», - deıdi T. Muratov.
Buǵan deıin Tımýr Muratov elordadaǵy epıdemıologııalyq jaǵdaıdy shilde aıyndaǵy aýyr kezeńge teńegen edi.
Koronavırýs ınfektsııasy naýqastarynyń ósimi Naýryz meıramynan keıin baıqaldy. Astanalyq dárigerler men barlyq medıtsınalyq qyzmetkerler qaıtadan eki ese júktemede jumys istep jatyr.
KVI-men kúresý úshin 11 statsıonar uıymdastyryldy, onyń ishinde 10 ınfektsııalyq, bir karantındik statsıonar («Ramada Plaza» qonaq úıi bazasynda) bar. Qosymsha úsh uıymnyń bazasynda 300 ınfektsııalyq tósek-oryn ashylýy múmkin.
