«Nur-Sultan - Túrkistan» marafony aıaqtaldy
TÚRKІSTAN. QazAqparat - «Nur-Sultan-Túrkistan» júgirý marafonynyń qatysýshylary Túrkistan qalasyna jetti. Óńirdiń ákimdigi sporttyq sharaǵa qatysýshylarǵa laıyqty qoldaý kórsetip, olardy sán-saltanatymen qarsy aldy, dep habarlaıdy QazAqparat tilshisi.
Qatysýshylar aýa raıynyń sýyqtyǵyna qaramaı, Betpaq daladan ótip, Aqmola, Qaraǵandy jáne Qyzylorda oblystarynan 1400 shaqyrymdaı jol júrip keldi. Olarmen birge tájirıbeli qutqarýshylar toby, medıtsınalyq qyzmetkerler de erip júrdi. Marafon barysynda qatysýshylar eldi mekenderde aıaldap, jurtshylyqpen kezdesý ótkizdi.
Marafonnyń jabylý saltanaty Túrkistan qalasyndaǵy Esimhan alańynda túıindeldi. Saltanatty jıynda Túrkistan qalalyq ardagerler keńesiniń tóraǵasy Jarqynbek Qulbaıymbetov pen Nur Otan partııasy Túrkistan oblystyq fılıaly tóraǵasynyń orynbasary Halıma Jantóreeva quttyqtaý sóz sóılep, kópshilikti otansúıgishtikke shaqyrǵan bul bastamanyń máni zor ekenin jetkizdi. Kópshilikti kele jatqan Táýelsizdik kúni merekesimen quttyqtady. Sondaı-aq marafonnyń jetekshisi, «Qazaqstan qurylysshylar odaǵy» RZTQ tóraǵasy Talǵat Erǵalıev jańa tynysy ashylǵan Túrkistan qalasyna kelgenine qýanyshty ekenin jetkizip, qalada ıgi ózgerister kóp baıqalǵanyn atap ótti. Qatysýshylar quramynda talaı syndarda shyńdalǵan, kúnine birneshe saǵat boıy toqtamaı júgirýge qaýqarly, myqty azamattar toptasqanyn aıtqan ol jastardy otansúıgishtikke, týǵan jerdi qadirleýge, sportpen shuǵyldanýǵa shaqyrdy.
Sharanyń jabylý saltanatynda osy marafondy ótkizýge eńbek sińirgen birneshe azamatqa arnaıy alǵys hattar tapsyryldy. Marapattalǵandar arasynda Túrkistan oblystyq deneshynyqtyrý jáne sport basqarmasy basshysynyń orynbasary A.Berdashev, Nur Otan partııasy Túrkistan oblystyq fılıaly tóraǵasynyń birinshi orynbasary B.Tájibaev jáne ózge de azamattar bar.
Saltanatty jıynǵa «Jas Otan» jastar qanatynyń ókilderi, Túrkistan qalasyndaǵy sport mektepteriniń bapkerleri men sportshylary da qatysyp, Nur-Sultannan Túrkistanǵa jaıaý kelgen marafonshylarmen estelikke sýretke tústi.
Myń shaqyrymnan astam jol júrip kelgen meımandar Túrkistan qalasynyń kórikti oryndaryn aralap, oblys ortalyǵynyń damý barysyna oń baǵalaryn berdi.
Aıta keteıik, Táýelsizdik kúnine arnalǵan marafon elorda men jańadan qurylǵan Túrkistan oblysynyń sporttyq-mádenı áleýetin kóterý, otanshyldyqty, salaýatty ómir saltyn nasıhattaý maqsatynda qolǵa alynǵan bolatyn. Aıtýly sporttyq is-sharany «Astana jelaıaǵy» marafon klýby» qoǵamdyq birlestigi, «Qazaqstan qurylysshylar odaǵy» RZTQ, Nur Otan partııasy, Nur-Sultan qalasy ákimdigi, QR Іshki ister mınıstrligi, QR Mádenıet jáne sport mınıstrligi birlesip uıymdastyrǵan.
Eske slaa ketsek, 28 qarashada Nur-Sultannyń memlekettik rámizder alańynan bastaý alǵan marafonnyń ashylý saltanatyna belgili sportshylar, depýtattar, Nur Otan partııasynyń ókilderi, qoǵam qaıratkerleri, elordalyq kásipkerler men qurylysshylar qatysqan edi.
