Nur-Sultan turǵyny karantın kezinde qyz uzatý toıyn ótkizgen
NUR-SULTAN. QazAqparat – Keshe saǵat 18:40-ta monıtorıng júrgizý toby «Han Talapaı» meıramhanasynda ótip jatqan toıdyń ústine túsken.
Bas sanıtarlyq dárigerdiń qaýlysyna qaramastan, uıymdastyrýshy toıǵa 50-ge jýyq qonaq shaqyrǵan. Otbasylyq mereke toqtatyldy. Meıramhana ıesi men toı uıymdastyrýshysy salynǵan tyıymdy elemeı, adamdardyń densaýlyǵyna qaýip tóndiretin jaǵdaı ornatty. Bul týraly QazAqparat Nur-Sultan qalasynyń polıtsııa departamentine silteme jasap habarlaıdy.
Meıramhana ákimshisine qatysty jınalǵan materıal protsessýaldyq sheshim qabyldaý úshin Nur-Sultan qalasy Esil aýdanynyń Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.
Tártip saqshylary azamattardy karantın rejımin saqtaýǵa shaqyrady. Aýrý juqtyrý oqıǵalaryn boldyrmaý maqsatynda tártip saqshylary turǵyndarmen arnaıy áńgimelesý júrgizedi. Mundaı sharalar azamattarǵa májbúrli yqpal etý sharalarynan góri tıimdirek áser etedi.
«Ókinishke qaraı, aldyn alý sharalaryn elemeý oqıǵalary áli de oryn alyp otyr. Sońǵy táýliktiń ishinde ǵana Polıtsııa departamentiniń qyzmetkerleri 57 kásipkerlik nysanyn tekserip, sonyń ishinde 43-inde karantın rejıminiń buzylýyn anyqtaǵan.
Azamattar salynǵan tyıymdy elemeı, otbasylyq merekelerdi áli de ótkizýde, sol arqyly egde jastaǵy adamdardyń ǵana emes, balalar ómiri men densaýlyǵyna qaýip tóndirip otyr. Barlyq tártip buzýshylar qoldanystaǵy zańnamaǵa sáıkes jaýapqa tartylady», - dep qosyp ótti polıtsııadan.
