Nur-Sultan turǵyndary qaı oryndarda vırýs juqtyrady
NUR-SULTAN. QazAqparat – Elordanyń bas sanıtarlyq dárigeri Sarhat Beısenova qala turǵyndary jıi koronavırýs juqtyrǵan oryndardy atady, dep habarlaıdy QazAqparat tilshisi.
«Sońǵy 19 kúnde qalamyzda táýligine 1,5 myńnan astam aýrý tirkelgen. Qazirgi ýaqytta bazarlar, saýda ortalyqtary, qoǵamdyq kólikter, meıramhana, kafe-bar, eńbek ujymdary jáne saıabaqtar men demalys oryndary negizgi aýrý juqtyratyn jerler bolyp qala beredi», - dedi S. Beısenova elorda ákimdiginde ótken brıfıngide.
Spıkerdiń aıtýynsha, bazardaǵy juqtyrý 7%-dan 15%-ǵa deıin, saýda nysandarynda – 19%-dan 24%-ǵa deıin, keńselerde – 13%-dan 28%-ǵa deıin, saıabaqtar men demalys aımaqtarynda – 15%-dan 18%-ǵa deıin, sondaı-aq 0,8%-dan 7%-ǵa deıin – naýqastar úılený toılaryn jáne t.b. buqaralyq is-sharalardy ótkizýge qatysqan. Naýqastardyń 8%-y qoǵamdyq kólikti turaqty paıdalanady.
Aıta keteıik, elordada COVID-19 boıynsha epıdemıologııalyq jaǵdaı qolaısyz. Bes aı boıy qala «qyzyl» aımaqta tur, sońǵy 13 kúnde ınfektsııalyq statsıonarlar júktemesi 70%-dan asyp jáne 100 myń turǵynǵa shaqqanda tósek-orynnyń tolý kórsetkishi 200-den joǵary bolǵandyqtan Nur-Sultan «qoıý qyzyl aımaqta» boldy.
Kesheden beri ınfektsııalyq statsıonarlar júktemesi 69%-ǵa túsip, elorda taǵy da «qyzyl aımaqqa» aýysty.
