«Nur-Sultan-Temirtaý» trassasynda eki adam mert boldy
NUR-SULTAN. QazAqparat – «Nur-Sultan-Temirtaý» avtojolynda kólik apatynan eki adam qaza boldy, dep habarlaıdy QazAqparat Qaraǵandy oblystyq Polıtsııa departamentiniń baspasóz qyzmetine silteme jasap.
«Oqıǵa búgin, 14 aqpan kúni saǵat 10-dar shamasynda «Nur-Sultan-Temirtaý» avtojolynyń elorda baǵytynda boldy. Aldyn ala nusqa boıynsha, «Foton» avtokóligi eki júk kóliginiń ortasynda qysylyp qalǵan. Saldarynan «Foton»-nyń júrgizýshisi men jolaýshysy oqıǵa ornynda kóz jumdy.
«QazAvtoJol» UK» AQ baspasóz qyzmetiniń aqparatyna sáıkes, oqıǵa ornyna kompanııanyń 13 arnaıy tehnıkasy (4 biriktirilgen jol mashınasy, 3 avtogreıder, 3 tıegish jáne 3 MTZ) jumyldyryldy.
«Barlyǵy respýblıka boıynsha 776 tehnıka jumys jasaýda. Barlyq suraqtar boıynsha 1403 nómirindegi baılanys ortalyǵyna habarlasýǵa bolady. Júrgizýshilerge jol erejesin saqtaý qajettigin, ruqsat etilgen jyldamdyqty asyrmaı, qaýipsiz qashyqtyqty ustanýdy eskertemiz. Sonymen qatar, saparǵa tek qysqy dóńgelektermen shyǵýǵa keńes beriledi», - dedi «QazAvtoJol» UK» AQ-dan.
Aıta keteıik, 13 aqpan kúni qatty burqasyn saldarynan elordadan shyǵatyn eki aqyly jolda jappaı jol-kólik apattary boldy.
Onyń biri saǵat 15:00-de «Şýchınsk—Nur-Sultan» avtojolynda tirkeldi. Joldyń Nur-Sultan qalasyna qaraı 36-shaqyrymynda 20-ǵa jýyq avtokólik soqtyǵysyp qaldy.
Al elordadan Şýchınskige qaraı joldyń 37-shaqyrymynda 16 avtokólik ózara soqtyǵysty. Munda 5 adam jaraqat aldy. Onyń ishinde 2 jasar bala bar.
Úshinshi jol-kólik oqıǵasy «Nur-Sultan-Temirtaý» avtojolynyń 1408-shaqyrymynda saǵat 16:00 kezinde boldy. Shoqaı eldi mekeniniń mańynda 15 kólik soqtyǵysyp qalǵan. Onyń ishinde 3 júk mashınasy, 2 gazel, 10 jeńil kólik bar.
Búgin QR Іshki ister mınıstrliginiń Tótenshe jaǵdaılar komıtetinen málim etkendeı, aýa raıynyń nasharlaýyna baılanysty tórt óńirde - Aqmola, Qaraǵandy, Pavlodar oblystary men Nur-Sultan qalasynda Jedel shtabtar jumystaryn qaıta bastady.
