Nur-Sultan – Şýchınsk baǵytynda jol apaty azaımaı tur
NUR-SULTAN. QazAqparat - Aqmola oblysynda jyl basynan beri 400-den astam jol-kólik oqıǵasy tirkelse, olardyń 29-y Nur-Sultan – Şýchınsk baǵytyndaǵy aqyly jolda bolǵan, dep habarlaıdy «Habar 24».
Sonyń saldarynan 33 adam aýyr jaraqattanyp, 7 kisi ajal qushqan. Apattyń aldyn alý úshin aımaq polıtseıleri joldyń birneshe jerine fotokamera qoıypty. Ol jyldamdyqty asyrǵan kólikti ózi tirkep, aqparatty arnaıy ortalyqqa jóneltedi. Osy arqyly zań buzýshyǵa aıyppul joldanady.
Qondyrǵylardyń biri Şýchınsk qalasynyń tusynda bolsa, ekinshisi Bulandy aýdanynyń aýmaǵynda ornalasqan. Alaıda, bunyń ózi qazir nátıje bermeı otyr. Al, polıtseıler bolsa, «qaıǵyly jaǵdaılarǵa júrgizýshilerdiń ózderi kináli» deıdi.
«Bizdegi eń negizgi problema – jyldamdyqty asyrý. Belgilengen jyldamdyqty saqtamaý, óte qıyn jaǵdaılarǵa alyp keledi. Máselen, Şýchınsk – Nur-Sultan tasjolynda bir apattan 3-4 adam kóz jumǵan oqıǵalar boldy. Bul – aıdyń-kúnniń amanynda bolǵan apattar. Al borandy kúnderi nemese kóktaıǵaq bolǵan kezderi eshqandaı jol-kólik oqıǵasy tirkelgen joq», deıdi oblystyq ákimshilik polıtsııa basqarmasynyń bastyǵy Aslan Qyzbıkenov.
