«Nur-Sultan-Şýche» tasjolyn qardan tazartý jumystary syn kótermeıdi
«Sapaly jol» jobasy sheńberinde Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń janyndaǵy Arnaıy monıtorıngtik toby men «Ulttyq jol aktıvteri sapasy ortalyǵy» RMK Aqmola oblysy boıynsha fılıaly birlesip, avtomobıl joldaryn paıdalaný men kútip ustaýǵa qoǵamdyq monıtorıng júrgizdi, dep habarlaıdy QazAqparat tilshisi vedomstvonyń baspasóz qyzmetine silteme jasap.
Monıtorıng barysynda arnaıy top «QazAvtoJol» UK» AQ qyzmet kórsetetin «Şýche - Nur-Sultan» aqyly avtomobıl jolyna shyǵyp, joldy qardan tazalaý jumystaryna nazar aýdardy. Osy avtokólik jolyn kútip-ustaýǵa jáne jóndeýge 1,2 mıllıard teńgeden astam qarjy qarastyrylǵan.
Vedomstvodan atap ótkendeı, bıyl qysta jaýǵan qar mólsheri normadan asyp ketken. Al kommýnaldyq qyzmetter buǵan daıyn emes bolyp shyqty. Mamandandyrylǵan jol tehnıkasynyń jetispeýshiligi qolaısyz aýa raıy kezinde joldy qardan tazartý - basty máseleniń biri bolyp otyr. Sonymen qatar, jol-paıdalaný ýchaskeleri Şýche, Makınsk, Aqkól eldi mekenderinde ornalasqan menshik quqyǵynda tıisti tehnıkasy bar jeke jáne zańdy tulǵalardy qar jınaýǵa jedel tartýǵa múmkindik joq. Sondaı-aq, Nur-Sultan qalasynda tótenshe jaǵdaılar rejimi jarııalanǵan kezde tehnıkanyń basym kópshiligi elorda kóshelerin qardan tazartýǵa tartylady, sol sebepti, Aqmola óńirinde arnaıy tehnıkanyń jetispeýshiligi týyndaıdy.
«Monıtorıng kezinde sheteldiń keıbir sapasyz tehnıkalary kúrdeli aýa-raıy jaǵdaılarynda isten shyqqany anyqtaldy. Al, qosalqy bólshekti satyp alý tapsyrys berýshi úshin óte tıimsiz, óıtkeni kelip túsetin bólshek tehnıkalyq parametrlerge sáıkes kelse de, olardyń sapasy tómen. Sondaı-aq, taldaý barysynda belgili qar ustap qalatyn ýchaskelerde júrý bóliginde qar úıindisin azaıtý úshin temir-beton qorshaýlar sanyn arttyrý jáne osyndaı qorshaýlardyń eki-úsh deńgeıli ornatylýyn qarastyrý usynyldy», - dedi Sybaılas jemqorlyqqa qarsy is-qımyl agenttiginiń Aqmola oblysy boıynsha departamentiniń baspasóz hatshysy Dınara Nurtas.
Al, «Jol aktıvteri ulttyq sapa ortalyǵy» Aqmola oblystyq fılıalynyń qyzmetkeri, jol ınjeneri Abylaı Tóleýovtiń aıtýynsha, Býrabaı aýdanynda jaqynda bolǵan borannan keıin jol tazalanǵanymen, onyń boıyndaǵy aıaldamalar mańy múldem tazalanbaǵan. Jol ınjeneri joldy paıdalaný ýchaskesiniń basshylyǵyna kemshilikterdi joıý jaıly eskertpe jazyp qaldyrdy. Al, Aqkól aýdanynyń tusynda joldyń keıbir bólikterinde úsh jolaqtyń ekeýi ǵana tazalanǵan. «Nur-Sultan-Şýche» tasjolynyń 157-shi shaqyrymynda joldyń úshinshi jolaǵynda qar taý bop úıilip jatyr. Bul, kólik qozǵalysynyń qaýipsizdigine áser eteri sózsiz.
Aıta ketý kerek, aqyly avtojolda jol júrý úshin jınalǵan qarajattyń jumsalýy týraly jarııa aqparattyń bolmaýyna baılanysty avtokólik ıeleri tarapynan qaıshy pikir týyndaıdy. Osyǵan baılanysty, top joǵaryda kórsetilgen qarajattyń jumsalýy týraly aqparatty usynýda ashyqtyqty qamtamasyz etýdi usyndy.
Sonymen qatar, jol boıyndaǵy kempıngterdi tekserý qoqys shyǵarýǵa jáne qoǵamdyq dárethanalarǵa qyzmet kórsetýge baılanysty kemshilikterdiń bar ekenin atap kórsetti.
Odan basqa, jol ýchaskesinde bolyp jatqan barlyq jaǵdaılar týraly azamattar WhatsApp-chat arqyly JPÝ qyzmetkerlerin habardar etýge múmkindigi bar.
Júrgizilgen monıtorıng qorytyndysy boıynsha shyǵarylǵan barlyq eskertý men usynysty tıisti memlekettik organdarmen jáne mekemelermen jumys kezdesýinde jarııalaý josparlanyp otyr.
Budan bólek, tekserý barysynda jolaıyryǵy, kópir, jol belgileri, jol boıyndaǵy demalys nysandarynyń barlyǵy nazarǵa alyndy.
Osyndaı qoǵamdyq monıtorıng aldaǵy kúnderi «Almaty-Ekaterınbor», «Nur-Sultan-Ereımentaý», «Nur-Sultan-Qorǵaljyn» tasjoldarynda da jalǵasatyn bolady.