Nur-Sultan polıtsııasy: Maqsat – karantın talabyn buzǵandardy jazalaý emes, aldyn alý
«Polıtsııa ákimshiliginiń jumys tártibi burynǵydaı. Qyzmetkerler táýligine 13-14 saǵat aýysymmen jumys isteıdi. Kóptegen kásiporyn óz jumysyn qaıta bastaýyna baılanysty qaladaǵy kólik qozǵalysy 10-15% artty. Biz jaǵdaıdy baqylaýda ustaýdamyz. Jumys ýaqytyn birshama ózgerttik. Mobıldi posttardyń jumys isteý ýaqyty qysqardy. Biraq patrýlder aýlalardy aralap, baqylaý-túsindirý jumystaryn júrgizedi «, – deıdi E.Chýpekov.
Ákimshilik polıtsııa basqarmasy bastyǵynyń aıtýynsha, polıtsııa qyzmetkerleriniń turǵyndarmen jumysty kúsheıtýdegi basty maqsaty koronavırýs ınfektsııasynyń aldyn alý men eskertýge baǵyttalǵan.
«Azamattardyń shydamdy bolýyn suraımyn. Biz jazalaý sharalaryn qoldanbaýǵa tyrysamyz. Basty maqsat – aldyn alý. Eskertýmen ǵana shektelgimiz keledi. Turǵyndar tarapynan túsinistik bar», – dep atap ótti E.Chýpekov.
Elordada polıtsııa qyzmetkerleri táýlik boıy kezekshilik júrgizip, qalanyń barlyq aýdandarynda azamattar men avtokólikter qozǵalysyn qatań baqylaýda. Mobıldi toptar, jaıaý jasaq jumyldyrylǵan. Blokposttardaǵy jaǵdaı dron kómegimen qadaǵalanýda.
Qala aýmaǵy kóshe shekaralary boıynsha sharshylarǵa bólingen. Olardyń árqaısysynda tártip saqshylary jaǵdaıdy qadaǵalaıdy. Qalada 26 mobıldi beket qoıylǵan.
Nur-Sultanda azyq-túlik, dári-dármek satyp alýdy, qajet bolǵan jaǵdaıda medıtsına mekemelerine júginýdi, sondaı-aq qyzmeti ruqsat etilgen jumysqa shyǵýdy qospaǵanda, azamattardyń úıden shyǵýy shektelgen. Kámeletke tolmaǵandarǵa qala boıynsha eresektersiz júrýge tyıym salynady. Otbasy múshelerin qospaǵanda, kóshelerde úsh adamnan artyq jınalýǵa ruqsat etilmeıdi.
Polıtsııa qyzmetkerleri turǵyndar arasynda engizilgen shekteýlerdi saqtaý týraly túsindirme júrgizýde. Tótenshe jaǵdaı rejımin jáne shekteý sharalaryn qasaqana buzǵan jaǵdaıda tıisti zańnamaǵa sáıkes shara qoldanylady.