Nur-Sultan polıtseıleri túnde balalary qydyryp júrgen 50 ata-anany jaýapqa tartty

NUR-SULTAN. QazAqparat – ıÝvenaldyq polıtsııa qyzmetkerleri kámeletke tolmaǵandardyń arasynda quqyq buzýshylyqtyń aldyn alý, olardyń túngi ýaqytta zańdy ókilderiniń erip júrýinsiz oıyn-saýyq ortalyqtarynda qydyrýyn boldyrmaý úshin reıd júrgizdi, dep habarlaıdy QazAqparat Nur-Sultan qalasy Polıtsııa departamentiniń baspasóz qyzmetine silteme jasap.

Tártip saqshylary qoǵamǵa qarsy is-áreketterdi anyqtaý maqsatynda aýlalardy, saıabaqtardy, alańdar men jastar shoǵyrlanatyn basqa da oryndardy tekserip shyqty.

Osylaısha, polıtseıler túnde qalada zańdy ókilderiniń erip júrýinsiz qydyrǵan kámelettik jasqa tolmaǵan jasóspirimderdi anyqtady.

Saǵat 23:40-ta Nur-Sultan qalasy «Baıqońyr» aýdanynyń PB ıývenaldyq polıtsııa qyzmetkerleri Lýı Paster kóshesi boıynsha ákimshilik ýchaskeni tekserý barysynda saǵat 23:00-den keıin syrtta júrgen 16 jastaǵy boıjetkendi anyqtady.

Atalmysh fakti boıynsha kámelettik jasqa tolmaǵan boıjetkenniń zańdy ókiliniń qatysýymen QR ÁQBtK-niń 2-bólimi 442-baby boıynsha ákimshilik hattama toltyryldy.

Nur-Sultan qalasy PD Jergilikti polıtsııa qyzmetiniń basqaramasynyń bastyǵy Arman Aıtmaǵambetovtyń aıtýynsha, demalys kúnderi saǵat 23:00-06:00 aralyǵynda kámeletke tolmaǵandardyń zańdy ókilderinsiz úıden tys jerde júrýine qatysty 50 azamat ákimshilik jaýapqa tartyldy.

Sonymen qatar reıd barysynda balalardyń quqyqtaryn buzý faktilerin anyqtaý maqsatynda nysandar tekserildi, olarmen ákimshilik jáne qylmystyq zańnama normalaryn túsindirý boıynsha aldyn alý maqsatynda áńgime júrgizildi.

Tártip saqshylary ata-analar men mekeme ıeleri kámeletke tolmaǵandardyń zańdy ókilderiniń erip júrýinsiz turǵyn úıden tys jerde bolǵany úshin ákimshilik jaýapqa tartylatynyn eske salady.