Nur-Sultan polıtseıleri órtten 3 aılyq bala men qart adamdy qutqardy
NUR-SULTAN.QazAqparat - Patrýldik polıtsııa polkiniń ınspektorlary - aǵa leıtenant Ersultan Sarybaev pen Nurjan Jantaev Jeńis dańǵylynda patrýldeý kezinde ekinshi qabattaǵy páterden qoıý tútin shyqqanyn baıqaǵan, dep habarlaıdy QazAqparat Nur-Sultan qalasynyń Polıtsııa departamentiniń baspasóz qyzmetine silteme jasap.
Polıtseıler órt sóndirý brıgadasyn shaqyryp, ýaqyt joǵaltpaı, podezge júgirip kirgen. Aşy tútin podezdi alyp ketip, joǵarǵy qabattarǵa jetken. Tártip saqshylary turǵyndardy jedel kóshire bastaǵan. Osy ýaqytta olar joǵarǵy qabattan bir áıeldiń kómek surap aıqaılaǵanyn estigen. Onyń 3 aılyq balasy tunshyǵyp, demala almaı qalǵan. Polıtseıler esh oılanbastan kómekke umtylady.
Ersultan Sarybaev tútinge oranǵan páterdegi balany taza aýamen dem alýy úshin ashyq turǵan balkonǵa aparǵan, sodan keıin dymqyl jamylǵyǵa orap, kóshege shyǵarǵan. Tórtinshi qabatta 67 jastaǵy qarııa turady degendi estip, polıtseı er adamdy arqalap kóshege shyǵardy.
Patrýldik polıtsııa polki qyzmetkerleriniń qyraǵylyǵy men jedel is-áreketteriniń arqasynda qutqarýshylar kelgenge deıin qaıǵyly jaǵdaıdyń aldyn alýǵa múmkindik týdy.
«Eger polıtsııa qyzmetkerleri bolmasa, jaǵdaıdyń qalaı bolary belgisiz edi», - dep eske alady turǵyndar.
Polıtseılermen áńgime barysynda jańa týǵan balanyń anasy men qutqarylǵan qarttyń qyzy elordalyq polıtsııa departamentiniń bastyǵy Erjan Sádenovke alǵys bildirdi.
Polıtsııa qyzmetkerleri «Bizdiń jumys – adamdarǵa kómektesý» - deıdi.
Nur-Sultan qalasy polıtsııa departamentiniń basshylyǵy adamdardy qutqarýǵa kómek kórsetken polıtsııa qyzmetkerlerin marapattady.
