Nur-Sultan polıtseıleri «Aýlada qabyldaý» sharasyn ótkizýde
NUR-SULTAN. QazAqparat – Búgin turǵyn úılerdegi barlyq sanıtarlyq normalardy saqtaı otyryp, «Aýlada qabyldaý» aktsııasy bastaldy, dep habarlaıdy QazAqparat Nur-Sultan qalasy polıtsııa departamentine silteme jasap.
Astanalyq polıtseıler turǵyndardy qyzyqtyrǵan suraqtar boıynsha konsýltatsııa beredi. Sharaǵa, sonymen qatar, Nur Otan partııasynyń astanalyq fılıalynyń ókilderi, qoǵam qaıratkeri Bıbigúl Ysqaqova, emhananyń bas dárigeri – Nur-Sultan qalasy máslıhatynyń depýtaty Dınara Baıserkına, Almaty aýdany ákimdiginiń tirshilikti qamtamasyz etý bóliminiń basshysy Madııar Tuıaqbaev jáne PIK ókilderi, eriktiler men jol qozǵalysynyń jas ınspektorlary qatysýda.
Turǵyndardyń basym bóligin túngi ýaqyttaǵy tynyshtyqty buzý máselesi, JJE-ni buzý, beınebaqylaý kameralarynyń jumysy, túngi ýaqytta alkogoldi ishimdikterdi ishý jáne t.b. suraqtar alańdatty.
Azamattardyń árbir ótinishi polıtsııa qyzmetkerleriniń baqylaýyna alyndy. Olardyń árqaısysy boıynsha tekseris júrgizilip, kerekti sharalar qoldanylady. Aktsııa, sonymen qatar, kámelettik jasqa tolmaǵandar men olardyń ata-analarymen profılaktıkalyq jumys júrgizýdi maqsat etedi.
Odan bólek, aktsııa barysynda qala turǵyndarynan alǵys túsip jatty. Mysaly, bir áıel ishinde qujattary men 80 myń teńgesi bolǵan sómkeni taýyp bergeni úshin polıtseılerge alǵys aıtty. Ol abaısyzda óziniń sómkesin Small sýpermarketiniń mańyndaǵy arbada umytyp ketken. Osy ýaqytta jaqyn jerde bolǵan er adam sómkeni alyp, artynsha avtokólikke otyryp, ketip qalǵan.
Jedel basqarý ortalyǵynyń polıtseıleri beınebaqylaý kameralary arqyly kóliktiń nómirin jáne onyń ıesin anyqtaǵan. Er adam istegen isin moıyndady. Polıtseıler urlanǵan sómkeni ıesine qaıtaryp berdi. Ol óz kezeginde tártip saqshylaryna osyndaı jedel jumys úshin alǵysyn aıtty.
«Osyndaı aktsııalar polıtsııanyń halyqtyń qaýipsizdigin qamtamasyz etý máselesinde, sonymen qatar azamattardyń sıgnaldaryna jedel jaýap berýge olarmen qarym-qatynas jasaýǵa jaqsy áser etedi», - deıdi astanalyq polıtsııa basshysy Erjan Sádenov.
Jurtshylyqpen qarym-qatynasty nyǵaıtý jáne buqaramen keris baılanysty qamtamasyz etý maqsatynda profılaktıkalyq aktsııa Jırentaev 22, Ánet baba 3, Abaı dańǵyly 63, Saryarqa 11 turǵyn úıleriniń aýlalarynda saǵat 20.00-ge deıin jalǵasady.
