Nur-Sultan polıtseıleri 16 mln teńgeniń dári-dármegi men maskalar tárkiledi

NUR-SULTAN. QazAqparat –Elordada júrgizilgen kezekti reıd barysynda medıtsınalyq preparattardyń zańsyz saýdasymen aınalysqandar ustaly, dep habarlaıdy QazAqparat tilshisi ІІM baspasóz qyzmetine silteme jasap.

Naqtyraq aıtqanda, Orynbor kóshesinde «Folksvagen» avtokóligi toqtatylyp, ony tekserý barysynda Qytaıda óndirilgen «Lianhua» kapsýlasynyń 165 qaptamasy tárkilengen. Bul preparatty Qazaqstan Respýblıkasynyń aýmaǵynda satýǵa ruqsat joq. Ustalǵan jergilikti turǵyn preparattardy saıttardyń biri arqyly tapqanyn, qala aýmaǵynda sony satyp, paıda tappaq bolǵanyn moıyndady.

«Qazirgi ýaqytta bul dáriniń el aýmaǵyna qalaı kirgizilgeni anyqtalý ústinde. Taǵy bir jaǵdaıda qalanyń 33 jastaǵy turǵyny Paratsetamol, Ingavırın, Deksametazon, Tseftrıakson, Lıdokaın, Eýfılın, Sýmamed pen Tsıprolet syndy tapshy preparattardy satpaq boldy. Odan bólek, polıtsııa qyzmetkerleri taǵy bir azamattan 6500 maskany tárkiledi. 8 kúnniń ishinde Polıtsııa departamenti medıtsınalyq maskalar men qorǵanys quraldarynyń zańsyz saýdasynyń 36 jaǵdaıyn anyqtady. Atap aıtqanda, 4 500 qaptama dári-dármek, 238 500 dana maska, gradýsnıkter, qorǵanys halattary, kostıýmder, qolǵaptar, medıtsınalyq bas kıimder, kózildirikter, antıseptıkter men medıtsınalyq buıymdar tárkilendi. Tárkilengen zattardyń jalpy somasy 16 600 000 teńgeni qurady», - delingen habarlamada.

Anyqtalǵan árbir oqıǵaǵa qazirgi zańnamaǵa sáıkes quqyqtyq baǵa beriledi. Elorda polıtseıleri qala turǵyndaryn belsendilikke shaqyryp, dári-dármekti qymbattata nemese zańsyz satqandar anyqtalsa, qalalyq Polıtsııa departamentine júginýge nemese 8 [phone], 71-63-35, 8-747-620-57-93 (WhatsApp), 102 nómirlerine habarlasýdy suraıdy.