«Nur-Sultan-Petropavl» trassasynda júk kóligi «GAZelge» soǵyldy
KÓKShETAÝ. QazAqparat – «Nur-Sultan-Petropavl» trassasynda júk mashınasy evakýator kóligimen soqtyǵysty, dep habarlaıdy QazAqparat tilshisi.
Oblystyq Polıtsııa departamenti baspasóz qyzmetiniń málimetinshe, 15 shilde kúni, saǵat 18:02-de Shortandy aýdandyq polıtsııa bóliminiń kezekshi bólimine «Nur-Sultan-Petropavl» avtojolynyń 39-shaqyrymynda eki kólik soqtyǵysqany týraly habarlama túsken.
«Nur-Sultan qalasyna qaraı baǵyt alǵan Reseı Federatsııasynyń 61 jastaǵy turǵyny basqarǵan «Krone» markaly júk kóligi «Nur-Sultan-Petropavl» avtojolynyń 39-shaqyrymynda joldyń shetinde toqtap turǵan «GAZel» evakýator kóligimen soqtyǵysty. Saldarynan fýra joldyń ústine aýdarylyp qaldy, al «GAZel» avtokóliginiń júrgizýshisi túrli jaraqatpen Nur-Sultan qalasyndaǵy №2 qalalyq aýrýhanaǵa jetkizildi», - dedi vedomstvodan.
Polıtsııa departamentinen atap ótkendeı, Almaty oblysynyń 47 jastaǵy turǵyny basqarǵan «GAZel» kóligi salqyndatý júıesiniń isten shyǵýyna baılanysty jol shetine toqtaǵan. Kóliktiń dabyldy sıgnaly da janyp turǵan.
Jol apatyna baılanysty qajetti is-sharalar ótkizilgennen keıin túpkilikti protsessýaldyq sheshim qabyldanatyn bolady.
