«Nur-Sultan - Petropavl» tasjolynda qar tazalap júrgen kólik órtendi
KÓKShETAÝ. QazAqparat - Aqmola oblysy aýmaǵyndaǵy «Nur-Sultan-Petropavl» tasjolynyń boıynda qar tazalaıtyn kólikten órt shyqty, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, qańtardyń 27-de 14:30 kezinde Shortandy aýdandyq PB kezekshi bólimine «Nur-Sultan-Petropavl» tasjolynyń 44-shi shaqyrymynda, ıaǵnı Bozaıǵyr aýylynyń mańynda «QazAvtoJol» AQ tıesili qar tazalaıtyn «Supra» kóligi otqa oranǵany týraly aqparat túsken.
«Anyqtalǵandaı, órttiń shyǵýyna elektr symdarynyń qysqa tuıyqtalýy sebep bolǵan. Saldarynan kóliktiń kabınasy men qozǵaltqyshyna zalal kelgen. Kólik júrgizýshisi - 39 jastaǵy er adam», - dedi vedomstvodan.
Aıta keteıik, qar tazalaıtyn kóliktiń órtengen vıdeosy Instagram jelisinde taraǵan bolatyn.
