«Nur-Sultan-Nurly jol-Rıdder» poıyzynyń kestesi men baǵdary ózgerdi
NUR-SULTAN. QazAqparat - «Jolaýshylar tasymaly» AQ «Nur-Sultan-Nurly jol-Rıdder» baǵytyndaǵy №375/376 jolaýshylar poıyzynyń kestesi men baǵdary ózgergenin eskertti, dep habarlaıdy QazAqparat tilshisi.
«Tasymaldaýshy atyna kóptegen ótinishter túskennen keıin QR Indýstrııa jáne ınfraqurylymdyq damý mınıstrligi Kólik komıtetiniń jáne Shyǵys Qazaqstan oblysy ákimdiginiń kelisimimen atalǵan jolaýshylar poıyzynyń baǵdaryn ózgertý jumystary júrgizildi. 2019 jyldyń 22 mamyrynan bastap bul jyljymaly quram Semeı-Shar-Óskemen (Semeı-Lokot-Óskemen ýchaskesiniń ornyna) temir jol ýchaskesi arqyly ótetin bolady», - delingen kompanııa aqparatynda.
Sonymen qatar «Nur-Sultan-Saryaǵash» baǵytyndaǵy №086 jolaýshylar poıyzynyń qozǵalysy da ózgeredi. Jyljymaly quram elordanyń «Nur-Sultan-Nurly jol» temir jol vokzalynan shyǵyp, dál osy vokzalǵa qaıta keletin bolady. Poıyzdardyń kelý jáne ketýi ýaqyty týraly aqparattardy «105» anyqtama nómirine habarlasyp bilýge bolady.
Ulttyq tasymaldaýshy jolaýshylarǵa saparlaryn aldyn ala josparlaýǵa, bıletterdi temir jol kassalarynan nemese komıssııasyz EPAY.RAILWAYS.KZ resmı saıtynan onlaın satyp alýǵa shaqyrady.
