Nur-Sultan musylman áleminiń «jasyl» qalasy atandy
NUR-SULTAN. QazAqparat – Nur-Sultan qalasy birinshi bolyp Islam áleminiń «jasyl» astanasy atandy, dep habarlaıdy QazAqparat SІM silteme jasap.
Qazaqstannyń Mysyrdaǵy Elshisi Arman Isaǵalıev bastaǵan delegatsııa Marokkonyń astanasy Rabat qalasynda ornalasqan Bilim, ǵylym jáne mádenıet jónindegi Islam uıymynyń (ISESKO) shtab-páterinde ótken Ekologııa mınıstrleriniń 8-shi ıslam konferentsııasyna qatysty.
Marokko Koroli Muhammed VI qoldaýymen ótken bul forýmnyń basty taqyryby «Qorshaǵan ortany qorǵaý men turaqty damýdaǵy mádenı jáne dinı faktorlardyń róli» boldy.
Konferentsııaǵa 36 memleket pen 11 halyqaralyq uıymnyń delegatsııalary qatysty. Іs-shara barysynda qatysýshylar musylman áleminiń qorshaǵan ortasy, dúnıejúzilik jylý kóterilý úderisi, aýa men sý kózderiniń lastanýy problemalaryn talqylap, ıslam elderiniń ekologııany saqtaý jolyndaǵy saıasatyn damytý joldaryn belgiledi. Talqylaý nátıjesinde strategııalyq máni bar qujattar qabyldandy.
Sonymen qatar, forým aıasynda ıslam memleketteriniń qorshaǵan ortany qorǵaýǵa qosqan erekshe úlesi úshin arnaıy marapattar tapsyryldy.
ISESKO komıssııasy Nur-Sultan qalasy ákimdiginiń bul saladaǵy jumysyna joǵary baǵa berip, saıystyq negizde Qazaqstan astanasyna «Musylman áleminiń eń jasyl qalasy» nomınatsııasynda arnaıy syı berdi.
2017 jyly ISESKO Saýd Arabııasy Koroldigimen birlese otyryp, qoǵamnyń barlyq segmentterinde qorshaǵan ortany qorǵaý jaýapkershiligin nasıhattaý, qalalardy ekologııalyq tazalyqqa, jańa energııa kózderin qoldanýǵa úgitteý, sondaı-aq bilim, ǵylym, mádenıet, óner jáne medıa salalarynan naqty jáne ornyqty bastamalardy qoldaý maqsatynda Arab, Afrıka jáne Azııa aımaqtarynan úsh Islam astanasy júldesin jarııalaǵan bolatyn.
Bıyl Nur-Sultan qalasy tuńǵysh júldeni Azııa elderi tobynan alyp otyr. ISESKO basshylyǵy 2017 jyly «Bolashaq energııasy» uranymen «EKSPO» Halyqaralyq mamandandyrylǵan kórmesin ótkizgen, jalpy tazalyq, qorshaǵan ortany qorǵaý, jańa energııasy kózderi jobalaryn iske asyrý boıynsha qarqyndy damý baǵytyna túsken Nur-Sultan qalasy birinshi bolyp Islam áleminiń «jasyl» astanasy bolyp jarııalanýy zańdylyq ekenin tilge tıek etti.
Ádettegideı, bul júldeni alǵan qalada qorshaǵan ortany qorǵaý salasy boıynsha ornyqty damý, ǵylymı zertteý jobalary, ekologııalyq taqyryptarda halyqaralyq konferentsııalar, kórmeler jáne t.b. túrli is-sharalar qarqyndy uıymdastyrylady.
