Nur-Sultan men Atbasar arasynda jol jabyldy
NUR-SULTAN. QazAqparat - Aýa raıynyń buzylýyna baılanysty Nur-Sultan men Atbasar arasynda jol jabyldy, dep habarlaıdy QazAqparat.
Qalalyq 109 IKomek jedel qyzmetiniń habarlaýynsha, búgin 21 naýryz, saǵat 11.00-den bastap «Ekaterınbýrg - Almaty» tasjolynyń 1247-1003 shaqyrym aralyǵynda kóliktiń barlyq túrine júrýge tyıym salynǵan.
Oǵan aýa raıynyń aıaq astynan buzylýy, boran, joldyń kórinbeýi sebep boldy.
Bul jol ýchaskesi Nur-Sultan qalasynan Atbasar qalasyna deıingi aralyqty qamtıdy.
Eske sala keteıik, búgin Qazaqstannyń basym bóliginde jaýyn jaýyp, jel kúsheıetini eskertilgen bolatyn.
Qazaqstan boıynsha tuman túsip, elimizdiń ońtústik-shyǵysynda, batysynda - kóktaıǵaq, soltústiginde, soltústik-batysynda, shyǵysynda - jaıaý burqasyn soǵady.
Qazgıdromet málimetinshe, Aqmola oblysynda jeldiń jyldamdyǵy sekýndyna 15-20 metrge jetedi. Oblystyń soltústiginde, shyǵysynda jeldiń ekpini sekýndyna 23-28 metr bolady.
