Nur-Sultan men Almatydan Alakólge qatynaıtyn reıster bekitildi
Bıyl jazda Almaty men Nur-Sultandy «Dostyq» stansasymen jalǵaıtyn jańa poıyz jolǵa shyǵady. Bul týraly QR IIDM Kólik komıtetiniń tóraǵasy Samat Ǵylymov vedomstvonyń Telegram-kanalynda aıtty.
«Indýstrııa jáne ınfraqurylymdyq damý mınıstrligi Almaty jáne Nur-Sultan qalalarynan Alakólge qatynaıtyn poıyzdar men tirkeme vagondardyń sanyn arttyrý boıynsha maqsatty túrde jumys júrgizip otyr.
17 maýsymnan bastap halyqtyń suranysyn qanaǵattandyrý úshin aptasyna úsh ret «Almaty-Dostyq» poıyzy qatynaı bastaıdy.
Sondaı-aq, jaz mezgilinde Nur-Sultan–Dostyq poıyzy jolǵa shyǵarylady», - deıdi komıtet tóraǵasy.
Mınıstrlik bekitken Alakólge qatynaıtyn temirjol baǵyttarynyń tizimi mynadaı:
1. № 453/454 «Almaty-2–Dostyq», jaz boıy, aptasyna 3 ret;
2. «Qyzylorda–Semeı» baǵytyndaǵy №21/22 poıyz quramynda «Almaty–Dostyq» reısi, jaz maýsymynda, kún saıyn 8 tirkemeli vagon júredi;
3. № 258/257 «Nur-Sultan–Dostyq», jaz boıy, aptasyna 2 ret;
4. № 54/53 «Nur-Sultan–Dostyq», aptasyna 2 ret;
5. №121/122 «Nur-Sultan–Semeı», jaz boıy, kún saıyn 6 tirkemeli vagon;
6. «Almaty–Dostyq» qatynasyndaǵy jańa jolaýshylar poıyzy (10 vagon), 2021 jyldyń maýsymynan bastap aptasyna 3 ret.
Eske salaıyq, bıylǵy jazda astanadan Alakólge aptasyna 3 ret poıyz júretini týraly Premer-Mınıstrdiń birinshi orynbasary Álıhan Smaıylovtyń tóraǵalyǵymen ótken jıynda aıtylǵan bolatyn.
Sondaı-aq buǵan deıin habarlaǵanymyzdaı, Úrjar aýylyndaǵy áýejaıda kúrdeli jóndeý júretindikten, Alakóldiń Shyǵys Qazaqstandaǵy bóligine qatynaıtyn temirjol jáne avtobýs reısteriniń sany arttyrylady.
