Nur-Sultan men Almaty kóshelerinde polıtsııaǵa habarlasý qurylǵylary ornatylady
NUR-SULTAN. QazAqparat - Bıyl elorda jáne Almaty qalasynyń kóshelerinde polıtsııaǵa habarlasýǵa arnalǵan qurylǵylar ornatylady. Bul týraly QR Іshki ister mınıstriniń orynbasary Sáken Sársenov málim etti, dep habarlaıdy QazAqparat tilshisi.
«Bizdiń jańa jobalarymyzdyń biri aldaǵy ýaqytta kóshelerde «SOS« atty qurylǵy paıda bolady. Ol saıabaqtarda, kóshe qıylystarynda, mektep mańaılarynda jáne adam qozǵalysy kóp jerlerge ornatylady. Bul qurylǵy arqyly kez kelgen adam polıtseıge habar bere alady. Aıtalyq, adam kóshede kele jatyp jaısyz jaǵdaıǵa tap boldy, polıtseıge habarlasýǵa múmkindigińiz joq. Sol ýaqytta siz dalada ornalasqan «SOS« qurylǵysynyń tetigin bassańyz, avtomatty túrde polıtsııa bólimshesine dabyl jetedi. Sol sátte polıtsııa mobıldi qosymsha arqyly sizdiń qalanyń qaı jerinen habarlasyp turǵanyńyzdy anyqtap, jedel áreket etedi. Taǵy bir ereksheligi, siz tetikti basqan sátte mekenjaımen qosa sizdiń beıneńizdi de kórsetedi. Jyldyń sońyna deıin Nur-Sultan men Almaty qalasynda atalǵan qurylǵylardy ornatatyn bolamyz», - dedi Sáken Sársenov «SOS»-ty tanystyra turyp.
Sondaı-aq, vıtse-mınıstr polıtseılerge zamanaýı beınebaqylaý kamerasy beriletinin tilge tıek etti.
«Taǵy bir jańalyǵymyz, polıtseılerge arnalǵan jańa beınebaqylaý kamerasy. Qurylǵynyń ereksheligi, ol avtomatty túrde jumys jasaıdy. Qazir qoldanystaǵy beınebaqylaý kamerasy avtonomdy túrde jumys isteıdi. Ol degenimiz polıtseı beınebaqylaý kamerasyn qolmen basqarady, ıaǵnı qajet dese jazyp, bolmasa sóndire salady. Nemese qýaty sónip qaldy degen syltaý aıtýy múmkin. Al qazirgi beınebaqylaý kamerasy mobıldi qosymshaǵa tikeleı jalǵanǵan. Bul polıtseılerdiń jumysyn jeńildetýmen qatar, olarǵa baqylaý júrgizýge múmkindik beredi», - deıdi ol.
Buǵan deıin habarlaǵanymyzdaı, QR Іshki ister vıtse-mınıstri Sáken Sársenov balalardyń qaýipsizdigin qamtamasyz etýge arnalǵan jańa elektrondy qurylǵyny tanystyrdy.
Sondaı-aq, mınıstr orynbasary budan bylaı sottalǵan jáne úı qamaýyndaǵylar elektrondy bilezik arqyly baqylanatynyn málim etti.
Odan bólek , vıtse-mınıstr azamattardyń aryz-shaǵym túsirýine arnalǵan jańa mobıldi qosymshany tanystyrǵan bolatyn.
