Nur-Sultan men Almaty qalalaryna kirýge jáne shyǵýǵa barynsha shekteý qoıylady
NUR-SULTAN. QazAqparat - QR Іshki ister mınıstrligi karantın engizilgen Nur-Sultan men Almaty qalalaryna tún ortasynan bastap kirýge jáne shyǵýǵa barynsha shekteý qoıylatynyn eskertti, dep habarlaıdy QazAqparat tilshisi.
«22 naýryzda 00:00 saǵattan bastap Nur-Sultan jáne Almaty qalalarynda vırýstyq ınfektsııanyń odan ári taralýyna jol bermeýge baǵyttalǵan shekteý sharalary kúshine enedi. Shekteý azyq-túlik, taýarlar, dári-dármekter jáne birinshi kezekte qajetti zattardy jetkizetin avtokólikke, sondaı-aq júk jáne tranzıttik tasymaldardy júzege asyratyn kólikke qatysty bolmaıdy», - dep atap ótedi mınıstrlikten.
Vedomstvo málimetinshe, 19 naýryzdan karantın bastalǵannan beri beketterdegi jaǵdaı qalypty. Azamattar qabyldanǵan shekteý sharalaryna túsinistikpen qaraýda. Sonymen birge qasaqana jalǵan aqparat, onyń ishinde arandatýshylyq sıpattaǵy aqparat taratý faktileri kezdesýde. Mysaly, áleýmettik jelilerdiń birinde paıdalanýshy taksı júrgizýshisimen bolǵan áńgimeniń beınejazbasyn ornalastyrǵan. Onda taksı júrgizýshisi belgili bir aqy úshin qujattardy teksertpesten, blok-beketter arqyly kedergisiz ótkizýge ýáde beredi.
«Mundaı faktilerge jol joq Bul úshin quqyq qorǵaý kúshteri qajetti pármendi sharalar qabyldaýda. Nur-Sultan jáne Almaty qalalaryndaǵy blok-beketterde patrýldik polıtseılermen jáne áskerı qyzmetshilermen qatar ózindik qaýipsizdik qyzmetkerleri de jumys isteıdi. Olar zańdylyqtyń saqtalýyn jáne sybaılas jemqorlyqqa jol bermeý úshin baqylaýdy qamtamasyz etedi», - delingen taratylǵan aqparatta.
Qazirgi ýaqytta joǵaryda atalǵan arandatýshylyq beınejazbany taratý faktisi boıynsha tıisti tekserý júrgizilip jatyr. Osyǵan baılanysty ІІM jalǵan aqparat taratqany úshin jaýapkershilik qarastyrylǵandyǵyn eskertedi jáne azamattardan jalǵan sózge senbeýdi, al Nur-Sultan jáne Almaty qalalarynan shyǵý jáne kirýge baılanysty barlyq quqyqbuzýshylyqtar týraly polıtsııaǵa habarlaýdy suraıdy (telefondary: Nur-Sultan qalasynda – 71-60-20, Almaty qalasynda – 254-40-07, ІІM Ózindik qaýipsizdik departamentiniń senim telefony – 1402).
Karantındik is-sharalarǵa qatysty ózge suraqtar boıynsha ákimdikterge habarlasaý qajet (Nur-Sultan qalasy: 109, Almaty qalasy: 1309).
