Nur-Sultan-Qostanaı joly keńeıtile me – «QazAvtoJol» jaýaby

NUR-SULTAN. QazAqparat – Qostanaı-Nur-Sultan jáne Qostanaı-Troıtsk (RF shekarasy) avtojoldarynda aqyly júıes engizý máselesine qatysty qoǵamdyq tyńdaý ótti. Bul jaıynda «QazAvtoJol» UK» AQ baspasóz qyzmetinen málim etti, dep habarlaıdy QazAqparat tilshisi.

Qostanaı oblysynyń ortalyǵynda, sondaı-aq Áýlıekól, Fedorov, Qarabalyq, Qarasý jáne Qostanaı aýdandarynda ótken qoǵamdyq tyńdaý barysynda «Qazavtojol» ulttyq kompanııasynyń ókilderi atalǵan joldar 2-tehnıkalyq sanatqa jatatynyn, sondyqtan jeńil avtomobılderdiń júrýi tegin bolyp qala beretinin aıtqan.

Sonymen qatar, kompanııa mamandary respýblıkalyq mańyzy bar Qostanaı-Nur-Sultan tas jolyn keńeıtý múmkindigine qatysty halyqtyń suraǵyna jaýap berdi. Turǵyndardyń atap ótýinshe, atalǵan tar jolmen aýyr júk kólikteri jıi júredi. Sonyń saldarynan aımaqta jol apaty jıilep tur.

«Avtomobıl joldarynyń memlekettik standartyna sáıkes, tórt jolaqty jol táýligine qarqyny 7 myńnan astam kólik júrip ótetin 1-tehnıkalyq sanatqa jatady. Qazirgi ýaqytta Qostanaı-Nur-Sultan avtojolynyń júktemesi táýligine 5 myń avtomobılden aspaıdy. Bul 2 nemese 3-sanattaǵy eki jolaqty jolǵa qoıylatyn talaptarǵa sáıkes keledi. Sondyqtan, qosymsha jolaqtar salý týraly sheshim qabyldaý úshin kórsetilgen ýchaskedegi qozǵalys qarqyndylyǵy kem degende 30 paıyzǵa artýy kerek», - dep túsindiredi ulttyq kompanııa mamandary.

Aıta ketý kerek, qoǵamdyq tyńdaý barysynda jergilikti turǵyndar «QazAvtoJol» basshylyǵyna joldaǵan usynystaryn hattamaǵa engizýdi talap etken. Atap aıtqanda, olar oblys aýymaǵynda aýyl sharýashylyǵy tehnıkasynyń, kommýnaldyq qyzmet pen azyq-túlik taýarlaryn tasymaldaıtyn jáne basqa da jergilikti júk kólikteriniń aqyly joldarmen tegin júrýin qarastyrýdy suraǵan. Turǵyndardyń paıymynsha, mundaı jeńildik kommýnaldyq qyzmetter men azyq-túlik baǵasynyń kúrt ósýine tosqaýyl bolady.