Nur-Sultan kóshelerin sý basý problemasymen jańa mekeme aınalysady
NUR-SULTAN. QazAqparat – Jyl saıyn elorda kóshelerin erigen qar men jaýyn-shashynnyń sýy basyp qalady. Endigi ýaqytta atalǵan máseleni sheshýmen jańadan qurylǵan mekeme aınalysatyn bolady, dep habarlaıdy QazAqparat Elorda Info saıtyna silteme jasap.
«Bizdiń basqarma qalany jylý, jaryq jáne sýmen qamtamasyz etý jumystarymen aınalysady. Bizge júktelgen jańa mindet – elordany gazben qamtamasyz etý. Buǵan deıin habarlaǵanymyzdaı, kelesi jyldan bastap astanalyqtar gaz paıdalana bastaıdy. Basqarmanyń aldyna qoıylǵan negizgi tapsyrmalardyń biri – neshe jylǵy problemaǵa aınalǵan kóktem-kúz mezgilinde qala kóshelerin sý basý problemasy. Bul maqsatta osy máselemen aınalysatyn arnaıy mekeme quratyn bolamyz. Aıta ketý kerek, Qazaqstannyń basqa qalalarynda ondaı mekeme joq. Ol sharýashylyq júrgizý quqyǵyndaǵy memlekettik kásiporyn bolady. Qala boıynsha bir ǵana «Astana-Tazalyq» JShS úlgermeıdi jáne olardyń basqa da negizgi mindetteri bar», – dedi qalalyq Otyn-energetıkalyq kesheni jáne kommýnaldyq sharýashylyq basqarmasynyń basshysy Ernat Bázil.
