Nur-Sultan qalasynyń saılaý komıssııalaryna kadrlar daıyndalyp jatyr

NUR-SULTAN. QazAqparat - Búgin QR Prezıdenti janyndaǵy Memlekettik basqarý akademııasy bazasynda Nur-Sultan qalasynyń aýmaqtyq saılaý komıssııalarynyń músheleri jáne ýchaskelik saılaý komıssııalarynyń basshylary úshin oqytý semınary ótti, dep habarlaıdy QazAqparat tilshisi.

QR Ortalyq saılaý komıssııasynyń málimetinshe, oqytýdy saılaý zańnamalary men saılaý protsesterin uıymdastyrýda, saılaý naýqandaryn ótkizýde edáýir tájirıbeleri bar sarapshylar júrgizdi. Onyń barysynda 2017-2018 jyldary saılaý zańnamalaryna engizilgen ózgeristerge, memleket basshysy saılaýyn uıymdastyrý men ótkizý erekshelikterine baılanysty taqyryptar ashyq talqylandy. Baǵdarlamaǵa saılaý komıssııalarynyń jumystaryn uıymdastyrý, saılaýda daýys berý tártibi men daýys berýdi qorytyndylaý, saılaý zańnamalaryn buzǵany úshin jaýapkershilikter, qoǵamdyq baıqaýshylar men BAQ ókilderimen ózara qarym-qatynastyń tájirıbelik jáne dáristik sabaqtary engizilgen.

Memlekettik basqarý akademııasynyń rektory Áltaıyr Ahmetov Qazaqstan Respýblıkasy Ortalyq saılaý komıssııasy men akademııa arasyndaǵy 2018 jylǵy 8 aqpandaǵy memorandýmmen baǵyttary belgilengen seriktestikti atap ótti. Qazirgi kezde akademııanyń óńirlik fılıaldary QR Ortalyq saılaý komıssııasynyń ádistemelik qoldaýymen saılaý salasy kadrlaryn oqytý úshin oqý bazasyna aınaldy.

«Saılaý komıssııalary músheleriniń daýys berý kúni saılaýshylarmen ózin-ózi ustaý, múmkin bolatyn qaqtyǵys jaǵdaıattar máselelerine erekshe nazar aýdaryldy. Semınarǵa qatysýshylar alǵan bilimderin «QR Prezıdentin saılaý kúni» iskerlik oıyny barysynda tájirıbelik mashyqtary arqyly shyńdady. Ortalyq saılaý komıssııasy Elektorattyq oqytýdy uıymdastyrý bóliminiń ókili T.Ryspekov saılaýdy uıymdastyrýshylardyń kásibı daıarlyǵy sheshetin máselelerge erekshe nazar aýdarýǵa kóńil bóldi», - delingen taratylǵan aqparatta.

«Normatıvtik-quqyqtyq negizde bekitilgen elektorattyq oqytýdy uıymdastyrýdyń jańa júıelik tásilderin eskere otyryp, biz oqytýdyń deńgeıi joǵary bolady dep kútýdemiz. Buǵan negiz retinde QR OSK ázirlegen kaskadtyq ádispen saılaý júıesiniń barlyq deńgeıleri boıynsha saılaý protsesin uıymdastyrýshylaryn birneshe kezeńmen oqytý respýblıkalyq deńgeıde Ortsaılaýkomnan, ýchaskelik saılaý komıssııalaryna deıin júzege asyrylady», - dedi ol.

Semınar sertıfıkattar tabys etýmen aıaqtaldy. Mamyr aıy boıy ýchaskelik saılaý komıssııalary músheleri úshin semınar-trenıngter josparlanǵan.