Nur-Sultan qalasynyń sáýlettik qurylysyn josparlaý erejesi bekitildi
NUR-SULTAN. QazAqparat – Elorda máslıhaty Nur-Sultan qalasynyń sáýlettik kelbetin qalyptastyrý jáne qala qurylysyn josparlaý qaǵıdalaryn bekitý týraly sheshim qabyldady, dep habarlaıdy QazAqparat tilshisi.
Bul qujat ashyq NQA saıtynda jarııalandy. Qujatty qoǵamdyq talqylaý merzimi 18 mamyrǵa deıin jalǵasady.
Qujatta aıtylǵandaı, Nur-Sultan qalasynyń sáýlettik kelbetin qalyptastyrý jáne qala qurylysyn josparlaý kezinde qoǵamdyq talqylaýdy Zańnyń 13-baby sheńberinde ashyq jáne jarııa túrde ótkizý, qoǵamdyq tyńdaýshylardyń pikirin eskerý, Qazaqstan aýmaǵynda normatıvtik-tehnıkalyq talaptardy, qalanyń bas josparyn saqtaý, «Nur-Sultan – jaıly qala» master-jospary áleýmettik-ekonomıkalyq strategııasyna sáıkes jaıly orta qurý, qala turǵyndarynyń pikirin eskerip, qoǵamdyq keńistikterdi, kósheler men aýlalardy qaıta jańartýdy jobalaýdy júzege asyrý, qadamdyq qoljetimdilik talaptaryn eskerip, fýnktsıonaldyq aımaqtardy yqshamdap ornalastyrý jáne qoǵamdyq ortalyqtar júıesimen, áleýmettik jáne kúndelikti qamtamasyz etý, ınjenerlik jáne kólik ınfraqurylymy obektilerimen ózara baılanystyrý qajet.
Sondaı-aq, aýmaqtyń keshendi qaýipsizdigin, ony tabıǵı jáne tehnogendik sıpattaǵy tótenshe jaǵdaılardyń áserinen qorǵaýdy qamtamasyz etý, Nur-Sultan qalasyn damytýdy kóportalylyq, keshendi jáne jınaqy qurylys qaǵıdaty boıynsha júzege asyrý, qala aýmaǵynyń normatıvtik jáne tabıǵı jeldetilýin, ınsolıatsııa jáne qorshaǵan ortanyń shýynan oqshaýlaýdy sáýlet jáne qala qurylysy ádisterimen qamtamasyz etý kerek.
Budan bólek, qujatqa sáıkes, qala aýmaǵynda qurylys salýdy jobalaý (jol beriletin qabattylyq, ǵımarattardyń konfıgýratsııasy men ornalasýy, qurylys salý tyǵyzdyǵy) halyqtyń ómir súrý jaılylyǵyn qamtamasyz etý jáne qaladaǵy ekologııalyq jaǵdaıdy jaqsartý úshin jel rejıminiń ázirlengen kartasyna sáıkes júrgizilýi tıis.
