Nur-Sultan qalasynyń keshendi kólik shemasy bekitildi
NUR-SULTAN. QazAqparat – Búgin Nur-Sultan qalalyq máslıhatynyń kezekten tys sessııa otyrysynda elordanyń keshendi kólik shemasy usynylyp, qabyldandy, dep habarlaıdy QazAqparat tilshisi.
«Qaladaǵy kólik qozǵalysyn uıymdastyrý men basqarýǵa qatysty qoldanystaǵy quqyqtyq júıedegi olqylyqtar men qaıshylyqtardy joıýdyń jolyn usynamyz. Ol úshin qalanyń keshendi kólik shemasyn jasap, qabyldaǵan jón. Keshendi kólik sulbasyna myna fýnktsııalar kiredi: aldymen kólik qozǵalysyn basqarýdaǵy olqylyqtar men qaıshylyqtardy anyqtaý, jerdi paıdalaný men qalalyq kólik qozǵalysyn josparlaýdy biriktirý jáne kólik qyzmeti salasyna jaýapty organdardyń fýnktsııasy men ókilettiligin qaıta anyqtaý», - dedi City Transportation Systems (CTS) JShS-niń basqarma tóraǵasy Bekmyrza Igenberdınov máslıhat otyrysynda jasaǵan baıandamasynda.
Sondaı-aq, kompanııa basshysy, kólik qozǵalysy salasynda aldaǵy 10 jylǵa arnalǵan biryńǵaı baqylaý júrgizýdi usyndy.
«Sonymen qatar keshendi shemada kólik qyzmeti salasyndaǵy basty problemalardy anyqtap, olardy sheshýge basymdyq berilmek. Odan bólek, qoǵamdyq kólik, jol-kólik ınfraqurylymy, jol qozǵalysyn uıymdastyrý, kólik aǵyny, avtoturaq keńistigin basqarý jáne taǵy basqa problemalardy sheshý usynylyp otyr», - deıdi ol.
CTS-tiń basqarma tóraǵasy atalǵan jumysqa sheteldik mamandardy tartý kerektigin aıtty.
«Ákimdik halyqaralyq konsýltanttardy tarta otyryp, keshendi kólik shemasyn ázirleýdi qarjylandyrý men basqa da múmkindikterdi Úkimetpen pysyqtaıdy. Qarjylandyrý tetigi aıqyndalǵannan keıin, shemany ázirleý jumystary boıynsha qajetti rásimder júrgiziledi», - dedi Bekmarza Igenberdınov.
Buǵan deıin CTS basshysy elordanyń jol-kólik jáne qoǵamdyq kólik qozǵalysyndaǵy problemalardy tizip bergen edi.
