Nur-Sultan qalasynda úı salý úshin ruqsatty qalaı alady
NUR-SULTAN. QazAqparat – Elordada ǵımarat salý árdaıym ózekti máselelerdiń biri bolyp keledi. Úı salý úshin ruqsatty qalaı alatyny týraly Nur-Sultan qalasy Sáýlet, qala qurylysy jáne jer qatynastary bóliminiń bastyǵy Nurlan Uranhaev aıtyp berdi, dep habarlaıdy QazAqparat tilshisi.
«Eger adamnyń jer ýchaskesi bolsa jáne ol qala qurylysynyń barlyq normalaryna sáıkes kelse, sol jerdiń ıesi qurylysty bastamas buryn sáýlet-josparlaý tapsyrmasyn alýy kerek. Bul memlekettik qyzmetti sáýlet, qala qurylysy jáne jer qatynastary bólimi usynady», - dep atap ótti Nurlan Uranhaev.
Sonymen qatar, bul másele memlekettik qyzmet týraly bolǵandyqtan, qujatty berý ýaqyty reglamenttelgen.
«Eger bári sáıkes kelse, mysaly, qyzyl syzyqqa kirmegen bolsa, josparǵa sáıkes kelse úı salýǵa ruqsat alýǵa bolady. Kelesi qadam – eskızdi jobany kelisý. Bul da Nur-Sultan qalasy Sáýlet, qala qurylysy jáne jer qatynastary bóliminiń memlekettik qyzmetine jatady. Túsindirýdi jeńildetý úshin biz halyqqa arnap qaıda barý kerek jáne qandaı qujattar qajet ekendigi týraly jadynamalar jasadyq», - deıdi spıker.
Sáýlet-josparlaý tapsyrmasyn alyp, aldyn ala jobalaýdy keliskennen keıin tapsyrys berýshi saraptamadan ótip, qurylysty bastaýy kerek.
«Qurylys jumystary aıaqtalǵannan keıin nysan paıdalanýǵa beriledi. Zańǵa sáıkes Nur-Sultan sáýlet, qala qurylysy jáne jer qatynastary bóliminiń barlyq memlekettik qyzmetteri aqysyz kórsetiledi», - deıdi elordanyń bas sáýletshisi.
Eske sala ketsek, Nurlan Uranhaev 2019 jyldyń mamyr aıynda qalanyń sáýlet, qala qurylysy jáne jer qatynastary bóliminiń basshysy bolyp taǵaıyndaldy.
Buǵan deıin ol qalany abattandyrýdyń 2020-2025 jyldarǵa arnalǵan baǵdarlamasy týraly aıtqan bolatyn. Onyń aıtýynsha, astananyń bes shartty polıortalyqtary damıdy. Olar: eski alań aýmaǵy, Beıbitshilik kóshesi jáne Bógenbaı batyr dańǵyly, «Eýrazııa» aýmaǵyndaǵy kósheler, Qosshyǵululy kóshesi, Ázerbaev kóshesi, Qoshqarbaev kóshesi jáne Júrgenov kósheleriniń aýmaǵy.
