Nur-Sultan qalasynda kovıd statsıonarlary jabylyp jatyr

NUR-SULTAN. QazAqparat – Elordada kovıdke arnalǵan statsıonarlar jabylyp jatyr. Bul týraly Nur-Sultan qalasy Qoǵamdyq densaýlyq saqtaý basqarmasynyń bas mamany Jeleýhan Primqulov málim etti, dep habarlaıdy QazAqparat tilshisi.

«Qalada vırýstyń taralýy deńgeıiniń tómendeýine baılanysty Qoǵamdyq densaýlyq saqtaý basqarmasy mamyr-shilde aılarynda ınfektsııalyq bolyp beıimdelgen statsıonarlardy jabý týraly sheshim qabyldady. Osylaısha, sońǵy eki kúnde 370 oryndy 3 kovıdti statsıonar jabyldy, ıaǵnı Qalalyq psıhıkalyq densaýlyq ortalyǵy, Ulttyq qaýipsizdik komıtetiniń gospıtali men Qorǵanys mınıstrligi gospıtalindegi statsıonar jabyldy», - dedi Jeleýhan Primqulov.

Onyń aıtýynsha, osyǵan qosa, kelesi apta jáne aldaǵy ýaqytta aýrýdyń báseńdeýine baılanysty ınfektsııalyq, reanımatsııalyq oryndar taǵy eki statsıonarda jabylady. Osy oraıda 216 tósek oryndy №3 Kópbeıindi qalalyq aýrýhananyń akýsherlik jáne klınıkalyq bloktary, 112 oryndy akademık N.D. Batpenov atyndaǵy Ulttyq ǵylymı travmatologııa jáne ortopedııa ortalyǵy qamtylady.

Budan buryn habarlanǵandaı, elordada jedel járdem shaqyrtý deńgeıi azaıdy.