Nur-Sultan qalasynda karantın kezindegi talaptar kúsheıtildi
NUR-SULTAN. QazAqparat - Elorda ákimi Altaı Kólginov koronavırýs ınfektsııasynyń taralýyna qarsy áreket etý sharalaryn kúsheıtý týraly aıtty, dep habarlaıdy QazAqparat.
«Qurmetti qala turǵyndary! Búgin, 22 naýryz saǵat 00.00-den bastap qalaǵa kirip-shyǵýǵa tyıym salynady. Qalada ótkizý-baqylaý beketteri ornatyldy. Azyq – túlik pen qajetti taýarlardy tasymaldaýǵa esh kedergi joq. Halyqaralyq áýejaıǵa ushyp kelgen barlyq avıjolaýshylar medıtsınalyq tekserýden ótedi, test ótkennen keıin ǵana qalaǵa kire alady. Olardyń úı karantıninde bolýy shart. Sanıtarlyq normalar kúsheıtildi. Qala boıynsha dezınfektsııa júrip jatyr. Bul sharalar sizdiń jáne jaqyndaryńyzdyń qaýipsizdigi úshin qabyldandy. Biz birgemiz», - dedi qala ákimi Altaı Kólginov.
Elordaǵa kelgen jolaýshylar qala ákimdiginiń engizgen sharalarynyń mańyzdylyǵyn atap ótti.
«Bizdi koronavırýsqa tekserip jatqany qýantady. Saraptamadan ótip qana biz ózimizdiń jáne jaqyndarymyzdyń densaýlyǵy úshin senimdi bolamyz. Ákimdiktiń azamattardy qaı elden kelgenine qaramastan barlyǵyn tekserip jatqany durys boldy».
Jańa ereje engizilgen sátten bastap medıtsınalyq qyzmetkerler 10 reısti jumysqa aldy, bul 900 adam. Qalada shuǵyl shtab jumys isteıdi, koronavırýstyq ınfektsııa anyqtalǵan jaǵdaıǵa áreketter algorıtmi daıyn.