Nur-Sultan qalasynda karantın kezinde qandaı kólikterdiń qozǵalysyna shekteý qoıylady
NUR-SULTAN. QazAqparat - Nur-Sultan qalasynda 6 sáýirge deıin jeke tulǵalardyń menshikti kóligimen júrip-turýyna shekteý qoıyldy, dep habarlaıdy elorda ákimdiginiń resmı saıty.
Koronavırýs ınfektsııasy taralýynyń aldyn alý jónindegi qalalyq jedel shtab Nur-Sultan qalasy boıynsha karantın aýmaǵynda qoǵamdyq kólik qozǵalysyn, jeke tulǵalardyń menshikti kóligimen júrip-turýyn shekteý týraly sheshim qabyldady.
Bul rette, sáıkes uıymdar úshin jumys ornynan anyqtamasy bolǵan jaǵdaıda (nemese qyzmettik kýáligi bolsa) turǵylyqty jerinen jumysqa deıin jáne keri qatynaýǵa, turǵylyqty jerine nemese jumysyna jaqyn mańdaǵy dárihanalar men dúkennen azyq-túlik, dári-dármek pen medıtsınalyq buıymdar alýǵa, sondaı-aq shuǵyl jaǵdaıda medıtsınalyq mekemege barýǵa ruqsat etiledi.
Budan bólek, karantın aımaǵy shekarasynda medıtsınalyq kómektiń jedel qyzmetiniń, sanıtarlyq-epıdemıologııalyq qyzmettiń, sonymen qatar medıtsına mamandarynyń, azamattyq qorǵaý, órtke qarsy jáne apattyq qutqarý jumystary, kommýnaldyq, avarııalyq qyzmetterdiń jumysshylaryna, mamandandyrylǵan ınkassator kóligine, kúzet uıymdary men kásiporyndardyń jeke kúzet qyzmetine, quqyq qorǵaý organdarynyń qyzmetkerleri men kóligine, arnaıy memlekettik organdardyń, prokýratýra, qorǵanys mınıstrligi, ulttyq ulan, ІІM qylmystyq-atqarýshy júıesiniń mamandandyrylǵan jáne jeke kólikteriniń qozǵalysyna (qyzmettik kýálikti kórsetken jaǵdaıda) tosqaýyl qoıylmaıdy.
Sonymen birge, qurylys materıaldary, azyq-túlik pen azyq-túlikke jatpaıtyn ónimderdi, medıtsınalyq taýarlardy tasymaldaýdy júzege asyratyn 1 qosymshada kórsetilgen uıymdardyń júk kólikteriniń qozǵalysyna (qyzmettik kýáligin nemese jumys ornynan anyqtama kórsetken jaǵdaıda) shekteý qoıylmaıdy.
