Nur-Sultan qalasynda garajdan 25 keli gashısh tabyldy

NUR-SULTAN. QazAqparat - Elordalyq polıtseıler elorda aýmaǵynda asa iri kólemde esirtki zattaryn ótkizý «arnasyn» joıý boıynsha arnaıy operatsııa júrgizdi, dep habarlaıdy qalalyq PD baspasóz qyzmeti.

«Quqyqtyq tártip» jedel-aldyn alý is-sharasy aıasynda júrgizilgen uzaq merzimdi arnaıy jedel-tergeý is-sharalarynyń nátıjesinde elordanyń 39 jastaǵy turǵyny ustaldy.

Nur-Sultan qalasynyń polıtseıleri Kınologııalyq qyzmet ortalyǵynyń ıtterin paıdalana otyryp tintý barysynda «Mırnyı» garaj kooperatıvinen polıetılen qap tabyldy jáne onyń ishinde «gashısh» esirtki zaty bolǵan. Satýǵa daıyndalǵan zattyń salmaǵy 25 kelini qurady.

Nur-Sultan qalasy PD Esirtki qylmysyna qarsy is-qımyl basqarmasynyń bastyǵy polıtsııa polkovnıgi Erlan Akbarovtyń aıtýynsha, bul jaǵdaıda tárkilengen esirtki quraldarynyń sany esirtkini tutyný úshin 5000 bir rettik dozany quraıdy, olardyń quny «qara naryqta» 30 mıllıon teńgeni quraıdy. Atalǵan fakti boıynsha QR QK 297-baby 3-bóligi boıynsha sotqa deıingi tergeý amaldary júrgizilýde.

Kúdikti óz kinásin moıyndady. Elorda aýmaǵynda esirtki jetkizýge jáne ótkizýge qatysy bolýy múmkin basqa da adamdar anyqtalýda.